''Çelsi'' fanatları üçün üzücü xəbər var. Komandanın yeni transferi Kristofer Nkunku zədələnərək uzun müddətə sıradan çıxıb.

"Football-plus.az" xəbər verir ki, bu, Dortmund ''Borussiya''sına qarşı keçirilən son yoxlama oyununda baş verib. Çikaqoda baş tutan və 1:1 hesabı ilə bitən oyunun 22-ci dəqiqəsində Nkunku əvəzlənməli olub. Futbolçunun tibbi müayinəsi zamanı onun dizində ciddi zədə aşkarlanıb. Bir neçə aylığa sıradan çıxan Nkunkunun əməliyyat olunacağı da istisna edilmir. 25 yaşlı fransalı vinger bu yay 60 milyon avroya ''Leyptsiq''dən transfer olunmuşdu. ''Çelsi'' fanatları ondan çox şey gözləyirdilər. Amma Nkunku son dönəmlərdə zədəyəmeyilli oyunçuya çevrilib. Fransa yığmasının da şərəfini qoruyan futbolçu zədə üzündən ötən ilki mundialı buraxmalı olmuşdu.

Ötən mövsüm bir neçə ay topa toxuna bilməsə də, Nkunku 2022/23-ü 36 rəsmi oyun, 23 qol, 9 məhsuldar ötürmə göstəriciləri ilə tamamlamışdı.