Saşa Boe yenidən karyerasını Türkiyədə davam etdirə bilər.

Belə ki, ''Qalatasaray'' sabiq oyunçusunun durumunu yaxından təqib edir. Məlum olduğu kimi fransalı cinah müdafiəçisi ötən mövsümün qış fasiləsində Türkiyə üçün rekor məbləğ olan 35 milyon avroya ''Bavariya''ya transfer olunmuşdu. Amma onun Almaniya karyerası heç də uğurlu keçmir. Zədə üzündən Boe indiyə qədər Münhen nəhəngində cəmi 4 rəsmi oyuna çıxa bilib. Boe bu mövsümün əvvəlində 2 oyuna çıxdıqdan sonra yenə zədələnmişdi. Onun yığma fasiləsindən sonra, yəni noyabrın 15-də qayıdacağı güman edilir.

Almaniya mətbuatının iddiasına görə hər iki tərəf bir-birindən narazıdı. ''Bavariya'' rəhbərliyini Boenin tez-tez zədələnməsi qane etmir. Futbolçu özü isə düşünür ki, zədəli olmadığı dönəmdə də yetərli qədər şans qazanmır. Ona görə də ''Qalatasaray''ın qış fasiləsində fransalını ən azı mövsümün sonuna qədər icarəyə götürməyə çalışacağı barədə şayiələr yayılıb. Deyilənə görə Boe özü də sabiq klubuna qayıtmağın əleyhinə deyil. Amma onun ''Bavariya'' ilə 2028-ci ilə qədər müqaviləsi var. Yəni bu məsələdə hər şey ''Bavariya'' rəhbərliyinin qərarından asılı olacaq.

ƏLİ