Erik ten Haq çoxdan gözlənilən aqibəti yaşayıb: o, premyer-liqada “Vest Hem”ə məğlubiyyətdən (1:2) sonra “Mançester Yunayted”in baş məşqçi vəzifəsindən istefaya göndərilib.

Bu barədə İngiltərə klubunun mətbuat xidməti məlumat yayıb. MY rəhbərliyi niderlandlı mütəxəssisə gələcək fəaliyyətində uğurlar arzulayıb. Xatırladaq ki, Ten Haq baş məşqçi postuna 2022-ci ilin aprelində təyinat almışdı. “Yunayted” onun rəhbərliyi altında ümumilikdə 128 oyun keçirib, bu oyunlardan 72 qələbə, 20 heç-heçə və 36 məğlubiyyətlə ayrılıb. “Qırmızı şeytanlar” 2023-cü ildə Liqa kubokunu, bu il isə İngiltərə kubokunu qazanıb. Lakin hazırda komandanın işləri çox pisdi. MY premyer-liqanın turnir cədvəlində 9 oyuna 11 xalla 14-cü yeri tutur.

Mankunianlar Avropa Liqasında keçirdiyi ilk 3 matçda yalnız 3 xal qazana biliblər ki, bu nəticə ilə hazırda 36 komanda sırasında 21-ci yerdədilər.
Əlbəttə, belə bərbad nəticələrin fonunda Ten Haqın postunda çox qala bilməyəcəyi aydın məsələ idi. Artıq komandaya müvəqqəti başçılıq edəcək mütəxəssisin kimliyi müəyyənləşib. Ten Haqı komandada Ruud van Nistelroy əvəzləyəcək. Klubun rəsmi məlumatında MY-nin daimi məşqçi axtarışında olduğu da bildirilib. Qeyd edək ki, Van Nistelroyun sonuncu iş yeri PSV olub. O, Niderland klubundan ötən il ayrılıb. Sabiq hücumçu 2001-06-cı illərdə mankunianların formasını geyib.

İngiltərəli jurnalist Ben Ceykobsun verdiyi məlumata görə, MY hələ ki komandanı daimi əsasda çalışdıracaq mütəxəssisi müəyyən etməyib. Bir sıra mənbələr İngiltərə nəhənginin Yulian Naqelsmann (Almaniya yığması), Tomas Frank (Brentford), həmçinin hazırda heç bir komandanı çalışdırmayan Qaret Sautqeyt ilə Xavi Ernandesin namizədliyini gözdən keçirdiyini iddia edir.