“Mançester Yunayted”in Çempionlar Liqasında qrup səddini adlaya və ümumiyyətlə, 3-cü yeri belə tuta bilməməsi Erik ten Haqın çoxdan laxlayan kreslosunu əməlli-başlı silkələyib. Onun, belə desək, tezliklə kreslodan yıxılması gözlənilir.

Böyük Britaniya mənbələrinə görə, rəhbərlik böyük uğursuzluğa görə baş məşqçini istefaya göndərməyi düşünür. Bu qərara həmçinin komandanın premyer-liqada qeyri-sabit çıxışı da təsir edə bilər. Belə ki, 16 oyundan sonra 27 xalla turnir cədvəlində 6-cı yeri tutması da rəhbərliyi qane etmir. Artıq Ten Haqın mümkün xələfi də müəyyənləşib. Bu barədə “Relevo”nun yaydığı məlumatda “Yunayted”in Xulen Lopeteginin xidmətində maraqlı olduğu bildirilir.

Qeyd edək ki, ispaniyalı mütəxəssis bu ilin avqustunda “Vulverhempton”dan ayrılanda sonra hazırda işsizdi. Ten Haq isə MY-ni ötən ilin yayından çalışdırır.