Türkiyə çempionatının 10-cu turunda ''Qalatasaray'' 2:1 qalib gəlməklə ''Beşiktaş''a mövsümün ilk məğlubiyyətini yaşatdı.

''Cim-Bom''un heyətində Devinson Sançes ilə Osimhen, ''Qartal''da isə Muçi fərqləndi. Okan Burukun komandası bu nəticə ilə liderliyini bir qədər də möhkəmləndirdi və ən əsası həm ''Fənərbaxça'', həm də ''Beşiktaş'' ilə aradakı xal fərqini 8-ə yüksəltdi. Okan Buruk prinsipial oyunlarda əldə etdiyi uğurlu nəticələrlə tarix yazmaqda davam edir.

O indiyə qədər ''Qalatasaray''ın başında ''Fənərbaxça'', ''Beşiktaş'' və ''Trabzonspor''a qarşı 14 superliqa matçının 10-da qələbəyə sevinib ki, bu da 71 faiz deməkdi. Superliqa tarixində bu komandaların iştirakı ilə ən azı 10 oyuna çıxan baş məşqçilər arasında heç kim bu cür göstərici ilə öyünə bilməz. Elə Osimhen də qol vurmaqla diqqət çəkən göstəriciyə nail oldu.

O, ilk 5 superliqa matçının hər birində ən azı 1 qolun vurulmasında yaxından iştirak edərək 4 qol, 2 məhsuldar ötürmə ilə fərqlənib. Osimhen bununla da son 10 ildə Bafetimbi Qomisdən (7 qol, 2 məhsuldar ötürmə) bu yana ''sarı-qırmızılar''ın heyətində ilk 5 superliqa matçının hər birində ən azı 1 qolda yaxından iştirak edən ikinci futbolçu oldu.

ƏLİ