Bu yay “Barselona”dan ayrılan Xavi Ernandesin yenidən Asiyada işləmək imkanı var. O, Qətər yığmasına başçılıq edə bilər.

Bu barədə “Sport” qəzeti məlumat yayıb. İspaniya qəzetinin yazdığına görə, Qətər Futbol Federasiyasının təmsilşiləri ispaniyalı mütəxəssislə görüşərək onunla əməkdaşlıq imkanlarını müzakirə edəcəklər. Bu seçim heç də təsadüfi deyil. Belə ki, “Barselona”dakı (1998-2015) möhtəşəm karyerasını başa vurandan sonra 4 il “Əl-Sədd”in formasını geyən Xavi 2019-21-ci illərdə Qətər klubunu çalışdırıb. 44 yaşlı mütəxəssisin doğma klubu “Barselona”ya 2021-ci ilin noyabrından bu yayadək başçılıq etdiyini, komandanı 2022/23 mövsümündə La Liqada çempionluğa daşıdığını da yada salaq.

Yeri gəlmişkən, Qətər yığması hazırda DÇ-2026-nın seçmə turnirində A qrupunda 4 oyuna 4 xal toplayıb. Bartolome Markesin komandası İran, Özbəkistan və BƏƏ-dən sonra 4-cü yeri tutur. 62 yaşlı ispaniyalı məşqçinin milli komandaya 2023-cü ilin dekabrında təyinat aldığını da xatırladaq.