Yığmamızın da yer aldığı qrupda liderlik uğrunda mübarizənin İsveçlə Slovakiya arasında gedəcəyi aydındı. Bu üzdən favoritlərin Bratislavada gerçəkləşən ilk duelinin nəticəsi maraq doğururdu.

Oyun meydan sahiblərinin təzyiqi ilə başladı. İsveçi həm qapıçı, həm də topu qapı xəttindən çıxaran müdafiəçi xilas etdi. Skandinavlar tədricən özünə gələrək oyunu nəzarət altına almağı bacardılar. 25-ci dəqiqədə Ayyarinin hesabı açması gözlənilməz olmadı. Cəmi 7 dəqiqə sonra isə Dyökereşin ölümcül zərbəsindən sonra Rodak topu dəf etsə də, Sema təkrar zərbə ilə fərqi artırdı. İlk yarı 0:2 bitsəydi, slovakların məğlubiyyətdən qurtulması çətin olacaqdı. Sadəcə, hissənin sonunda isveçlilər intriqanın bərpa olunmasına rəvac verdilər. Onların qapıçısı Yohansson Dudanın ilk zərbəsini qaytarsa da, AÇ-dən yaxşı tanıdığımız Strelets dönən topa birinci çatdı. Bununla da meydan sahibləri fasilə ərəfəsində psixoloji üstünlük qazandı.

Yohanssonun slovakiyalı həmkarı Rodak 2-ci hissənin əvvəlində bir hücumun gedişində həm Kulusevskinin, həm də onun iki oyundaşının zərbəsinin qarşısını aldı. Qapıçının qəhrəmanlığı komanda yoldaşlarını da ruhlandırdı. Nəticədə 72-ci dəqiqədə Strelets Haraslinin asmasından sonra hesabı bərabərləşdirdi. Xatırladaq ki, məhz Strelets “Slovan”ın Çempionlar Liqasının əsas mərhələsinə vəsiqə qazanmasında önəmli rol oynamışdı. Elə Slovakiyanın ötən ay yığmamıza qalib gəldiyi oyunda da fərqlənmişdi.

İsveç – Slovakiya duelləri ilə bağlı maraqlı statistika qorundu. Belə ki, Slovakiya indiyəqədərki 8 oyunun heç birində qələbə qazanmayıb. 7 il əvvəl keçirilən yoldaşlıq oyununda skandinavlar hətta 6 cavabsız qol vurmuşdu.

C liqası, 1-ci qrup
3-cü tur
Slovakiya - İsveç 2:2 (1:2)
Slovakiya: Rodak, Hantsko, Şkrinyar, Vavro, Pekarik (Dyomber, 90), Beneş, Lobotka, Duda (Bero, 75), Haraslin (Dyuriş, 90), Strelets (Bojenik, 80), Suslov (Tupta, 90).
İsveç: Yohansson, Qudmundsson, Hin, Duqlas (Lindelöf, 62), Sema, Saletros, Çelstrem, Ayyari (Larsson, 62), Eliasson (Kraft, 90+2), Kulusevski, Dyökereş.
Qollar: Ayyari, 25 (0:1). Sema, 32 (0:2). Strelets, 44 (1:2). Strelets, 72 (2:2).
Vərəqələr: Vavro, 18. Duqlas, 40. Suslov, 51. Duda, 61. Çelstrem, 61. Dyomber, 90+3 – sarı.
Hakim: Mauritsio Mariani (İtaliya).
11 oktyabr. Bratislava. 15381 tamaşaçı.

4-cü tur
Azərbaycan – Slovakiya 1:3
Bayramov, 38 – Məmmədov, 15-öz qapısına. Haraslin, 75. Dyuriş, 87.

Estoniya – İsveç 0:3
Nanasi, 29; 37. Dyökereş, 66.

1. İsveç 4 3 1 0 11-3 10
2. Slovakiya 4 3 1 0 8-3 10
3. Estoniya 4 1 0 3 3-8 3
4. Azərbaycan 4 0 0 4 3-11 0