Qış fasiləsinə qədər ilk “5-liy”də yer almağı hədəf götürən “Sabah” oyuna istəkli başladı.

Son üç oyunda qələbəyə həsrət qalan, zədələrdən əziyyət çəkən “dənizçilər”in sürət yığan rəqiblə oyunda nə təklif edəcəyi maraq doğururdu. “Sabah” fırtına kimi əsdi, ötən mövsümdəki obrazını xatırlatdı və 4 cavabsız qolla qələbə qazandı.

Artıq matçın 3-cü dəqiqəsində Tilin zərbəsi müdafiəçi Bardeadan qayıtdı. "Tələbələr"in təzyiqi 5-ci dəqiqədə qolu gətirsə də, Çaklanın zərbəsi qeydə alınmadı. Tezliklə səhnəyə yenidən mərakeşli müdafiəçi çıxdı. Tilin qapı qarşısına qaldırdığı topa Sofian dəqiq baş zərbəsi vuraraq komandasını hesabda irəli çıxardı. Maraqlıdı ki, onun bu qoluna Elçin Məsiyev baş barmağını qaldırmaqıa reaksiya verdi, sanki demək istədi ki, bu dəfə qolu qaydalar çərçivəsində vurmusan. 22-ci dəqiqədə Tildən gələn top Hadudiyə toxunaraq Çaklanın başı istiqamətinə getdi. Mərakeşli bu imkanı da boşa vemədi. 28-ci dəqiqədə “dənizçilər” növbəti dəfə mərkəzə dəvət olundu. Nuriyev – Letiç – Sekidika kombinasiyasının ardından sonuncu iki cəhddə topu tora saldı. İlk iki qolda olduğu kimi, bu dəfə də qapıçı ilə müdafiəçilərinin fikrinin harda olduğunu müəyyənləşdirmək çətin idi. Beləliklə, artıq 28-ci dəqiqədə hesab 3:0 oldu. Prinsipcə Elçin Məsiyev elə bu anda final fitini səsləndirə bilərdi. Əlbəttə, AFFA-nın müvafiq qurumunun intizam sanksiyası olmasaydı…

İkinci hissəyə də nominal meydan sahibləri üstün başladı. 54-cü dəqiqədə Tilin möhtəşəm zərbəsindən sonra top tirə tuş gəldi. Qonaqların nadir hücumlarından biri 56-cı dəqiqəyə təsadüf etdi. Ramalinqom Bahadurdan topu qəbul etsə də, qapıya dəqiq zərbə vura bilmədi. 59-cu dəqiqədə Sekidika - İsayev kombinasiyasını Til qolla tamamladı. Beləliklə, “Səbail”i darmadağın edən "Sabah" xal ehtiyatını 22-yə çatdırdı.

Gözdən qaçmadı
* Təcili Tibbi Yardım maşını hakimin start fitindən 3 dəqiqə əvvəl stadiona çatdı.
* Stadiondakı hesab tablosu işləmirdi.
* "Sabah"ın müdafiəçisi Amin Seydiyevin həyat yoldaşı Aysun xanım körpəsi ilə birlikdə oyunu stadiondan izləyirdi.