Cümə axşamı Bakıda yığmamızı məğlub edən İsveçin daha bir autsayder – Estoniya ilə ev oyununda mərhəmətli davranacağını gözləməyə dəyməzdi.

Hakimin start fiti ilə hücumlara başlayan meydan sahibləri yarım saatın tamamında hesabı açdı. Estonların qapıçısı Heyn Semanın zərbəsini qaytarsa da, Dyökereş təkrar zərbə ilə topu tora qovuşdurdu. 40-cı dəqiqədə İsveç fərqi artırdı və Sema yenə hadisələrin mərkəzində idi. “Uotford”un vingerinin zərbəsindən sonra top İsakın önünə düşdü və “Nyukasl”ın snayperi fürsəti fövtə vermədi. Komandalar fasiləyə yollanmağa hazırlaşarkən oyunun taleyi həll olundu. Ofsayd tələsindən qurtulan Kulusevskinin fərqlənməsinə Heyn imkan vermədi, amma qapıçıdan dönən topa birinci Dyökereş toxundu. Elə ilk yarıda intriqa bitdi.

İsveç son mövsümdə B liqasından düşsə də, hücum potensialı möhtəşəmdi ki, bu da Azərbaycan və Estoniya ilə oyunlarda açıq-aşkar göründü.

Estoniya 2-ci hissədə də fəallaşmadı, əksinə, qonaqlar 62-ci dəqiqədə azlıqda qaldı. Palumets Saletrosun formasından tutub dartdığına görə 2-ci “sarı” ilə meydandan qovuldu. Ardıcıl 2-ci qələbəsini qazanan Yon Dal Tomassonun komandası qrup liderliyi yolunda daha bir addım atdı. Gözlənildiyi kimi, bu qrupda İsveçlə Slovakiya favoritdi, Azərbaycanla Etoniya isə autsayder. Maraqlıdı ki, ML-in yeni mövsümündə İsveçin vurduğu 6 qoldan üçü İsakın, üçü də Dyökereşin hesabındadı.

C liqası, 1-ci qrup, 2-ci tur
Slovakiya – Azərbaycan 2:0 (2:0)
İsveç – Estoniya 3:0 (3:0)
İsveç: Yohansson, Duqlas, Hin, Qudmundsson, Sema (Kayuste, 63), Saletros (Berqvall, 84), Eliasson, Ayyari (Nanasi, 63), Kulusevski, İsak (Nilsson, 79), Dyökereş (Elanqa, 79).
Estoniya: Heyn, Şenninq-Larsen (Pikk, 59), Paskoçi, Y.Tamm, Mets, Şayn (A.Tamm, 59), Palumets, Miller (Lilander, 83), Vetkal, Sappinen (Poom, 59), Sinyavski (Kristal, 72).
Qollar: Dyökereş, 30 (1:0). İsak, 40 (2:0). Dyökereş, 44 (3:0).
Vərəqələr: Palumets. 50. A.Taam, 89 – sarı. Palumets, 62 – qırmızı (ikinci sarı).
Hakim: Sven Yablonski (Almaniya).
8 sentyabr. Stokholm. 14858 tamaşaçı.

1. İsveç 2 2 0 0 6-1 6
2. Slovakiya 2 2 0 0 3-0 6
3. Azərbaycan 2 0 0 2 1-5 0
4. Estoniya 2 0 0 2 0-4 0

11 oktyabr: Estoniya – Azərbaycan, Sovakiya – İsveç.