Ceyhun Nuriyev də Slovakiya ilə oyundan sonra jurnalistlər önünə çıxdı.

“Football-plus.az” onunla müsahibəni təqdim edir.

- Hesabı çox tez bərabərləşdirdik. Məğlub olmalı deyildik. İkinci yarıya çox yaxşı başladıq və bir neçə təhlükəli vəziyyətimiz oldu. Hesabda önə də keçə bilərdik. Oyunun qırılma anı, təəssüf ki, hakimin qırmızı vərəqə göstərməsi oldu. Çünki vərəqəyə kimi üstün oyun sərgiləyirdik.

- Qırmızı vərəqə olmasaydı, nəticə fərqli ola bilərdi?
- Əminəm ki, olardı. Çünki topa nəzarət bizim əlimizdəydi. “Qırmızı” alandan sonra meydanda 10 nəfərlə mübarizə apardıq. Rəqibi də tanıyırdıq. 20-25 dəqiqə çox çətin oldu. Təəssüf ki, sona qədər dözə bilmədik.

- Mahir Emreli məğlubiyyəti qırmızı vərəqə ilə əlaqələndirdi. Sən səbəbi nədə görürsən?
- Tək səbəb o deyil. Məğlub olmuşuqsa, bu, hamının məsuliyyətidi. Təkcə Mahirin üzərinə atmaq düzgün deyil.

- Vəziyyəti dəyişmək mümkündümü?
- Düşünürəm ki, çox pis nəticədi. Belə olmasını biz də istəməzdik. Ən acı məğlubiyyət Estoniya qarşısında oldu. Xalsız qalmalı deyildik. Qarşıda iki oyun var və meydana maksimum nəticə üçün çıxacağıq. Hədəfimiz 6 xal qazanmaqdı. Milli üçün vuruşmalıyıq. Ən azı bu gün vuruşduğumuzu düşünürəm.

ƏSƏD SEYİDOV