“Doğrusu, bu sualları cavablamaq istəməzdim. Çünki belə ağır qələbədən sonra oyunun hansısa texniki tərəfdən dəyərləndirmək doğru olmaz. Qarşılaşmanın qırılma nöqtəsinə gəlincə, məncə, qırmızı vərəqə idi. Bu vərəqədən sonra “Qarabağ”, demək olar ki, tam geri oturmalı oldu. Doğrudu, bütün azarkeşlər hissə qapılıb, həmin vərəqənin yanlış olduğunu düşünürdü. Fəqət Elvin Cəfərquliyev açıq-aşkar rəqibin ayağını tapdalayaraq ikinci sarı vərəqəni aldı. Yəni bu epizodda hakimi günahlandırmaq yalnız matçın həyəcanı ilə bağlıdı. Özümüz də matçı izləyəndə verdiyi cəzaya görə hakimi qınadıq. Ancaq epizodun axarına təkrar baxanda görürsən ki, bu aşkar sarı vərəqədi. Hakimlik prizmasından baxsaq, hansısa qərəzli qərarlar verdiyini düşünmürəm. Bəlkə də hansısa cüzi epizodlarda, mübahisəli məsələlərdə “Braqa”ya tərəf olurdu. Hətta “Braqa”nın  vurduğu bir qol da var idi ki, o da oyunçunun əlinə dəydi və ya dəymədi. Bu çox incə məqam idi ki, qolu da saymadı. Hakimliyin bu tərəfi də var idi. Ümumiyyətlə, matçın qırılma nöqtəsinin qırmızı vərəqə olduğunu düşünürəm. Digər məsələləri götürməli olsam, düşünmürəm ki, uzaqdan vurulan zərbələr olmamalıydı. Cinahlardan da cərimə meydançasına çox top qaldırırdılar. Uzaq dediyimiz də cərimə meydançasının daxilindən və ya azca aralıdan endirilən zərbələr idi. Yəni çox da uzaq deyildi. Hətta rəqibin bəzi vuruşları çox qeyri-dəqiq idi. Amma ümumilikdə “Braqa”nın da hücumda çox da yaxşı çıxış edə bilmədiyini deyərdim. Bunun da səbəbi “Qarabağ”ın arxa xətdə yığcam müdafiə olunmağı bacarması idi. Lakin qırmızı vərəqəyə qədər. O ki qaldı əvəzetmələrə, bununla bağlı nəsə demək doğru deyil. Onsuz da dəyişiləsi oyunçular azdı. Yəni meydana girib, oyunun taleyini dəyişə biləcək futbolçular az idi. Bunu bacaranların da meydanda olduğunu düşünürəm. Buna görə də hansısa oyunçunu günahlandırmaq və yaxud da hansısa oyunçunun üzərinə düşən vəzifəni yerinə yetirmədiyini demək - bu barədə danışmaq şəxsim adına düzgün olmazdı. Ümumiyyətlə, oyunu texniki baxımdan çox araşdırmaq olar. Üslub və buraxılan səhvlər baxımından danışmaq şəxsim adına yersizdi. Belə həyəcanlı matçda qələbə qolun yiyəsinin yerli oyunçumuz Nəriman olması bizim üçün hər şeydən dəyərlidi”.

“Oyunun əsas qırılma anı Elvinin qırmızı vərəqə alması oldu. Çünki buna qədər dominantlıq bizdə idi. Amma ikinci yarının böyük hissəsini azlıqda oynamaq məcburiyyətində qaldıq. Bu da öz növbəsində matçın taleyini əlavə vaxta qədər uzatdı. Rəqib iki topun əvəzini çıxa bildi. Bununla da yekun hesab bərabərləşdi, əlavə və gərgin 30 dəqiqə izlədik. Silvanın əlavə vaxtda vurduğu qolu bizi yenidən ümidləndirsə də, rəqibin hesabı 3:1 etməsi işimizi çətinləşdirdi. Nəhayət, ən sonda Nərimanın vurduğu qol rəqibin bütün ümüdlərini qırdı. Əvəzetmələrə gəlincə, vacib idi. Çünki rəqib say çoxluğuna malik idi. Hesab edirəm ki, vaxtında və düzgün dəyişikliklər oldu. Bütün oyunçulara alqış düşür. 10 nəfərlə oynayasan və hesabda 0:2 geri düşəsən, iradə nümayiş etdirib, pley-off mərhələsini adlayasan... Buna yalnız alqış və təbrik düşür. Mən “Braqa” komandasının heç bir taktikasını görmədim. Qırmızı vərəqə olmasaydı, “Qarabağ” rahat və nizam-intizamlı oyunu ilə qələbə qazanacaqdı. Amma etiraf edək ki, belə qazanılan qələbənin ayrı ləzzəti var”.