İngiltərə çempionatında sentyabr ayının laureatları müəyyənləşib. Hər iki nominasiyada “Çelsi”nin üzvləri qalib gəliblər.

Ötən ayın ən yaxşı futbolçusu adına Koul Palmer layiq bilinib. O, sentyabrda premyer-liqada meydana çıxdığı 4 oyunda 5 qolun və 1 məhsuldar ötürmənin müəllifi olub. 22 yaşlı ingilis yarımmüdafiəçi ayın ən yaxşı oyunçusu adı uğrunda mübarizədə Harvi Barns (Nyukasl), Luis Dias, Rayan Qravenberx (hər ikisi “Liverpul”), Qabriel (Arsenal), Raul Ximenes (Fulhem), Duayt Maknil (Everton) və Olli Uotkinsi (Aston Villa) arxada qoyub.

Senyabrın ən yaxşı məşqçisi üçün nəzərdə tutulan mükafat isə Entso Mareskaya çatıb. Onun çalışdırdığı “Çelsi” ötən ay çempionatda keçirdiyi 4 matçı 3 qələbə və 1 heç-heçə ilə başa vurub.

Mareska London klubunda 2021-ci ili oktyabrında mükafatlanan Tomas Tuxeldən sonra ayın ən yaxşı məşqçisi adına layiq görülən ilk mütəxəssisdi.