İngiltərə premyer-liqasında mövsümün ən yaxşı futbolçuları müəyyənləşib.İki nominasiya üzrə qalib adını fərqli klubların üzvləri qazanıblar.

“Mançester Siti”nin yarımmüdafiəçisi Filip Foden mövsümün ən yaxşı oyunçusu seçilib. 23 yaşlı futbolçu mövsüm ərzində premyer-liqada 35 matçda iştirak edib, 19 qol vurub və 8 məhsuldar ötürmə edib.

Ən yaxşı oyunçu adına digər namizədlər sırasında Erlinq Holann (Mançester Siti), Aleksander İsak (Nyukasl), Martin Edeqor (Arsenal), Koul Palmer (Çelsi), Deklan Rays (Arsenal), Vircil van Diyk (Liverpul) və Oli Uotkins (Aston Villa) də var idi.

Mövsümün ən yaxşı gənc oyunçusu üçün ayrılan mükafat isə Palmerə çatıb. “Çelsi”nin 22 yaşlı yarımmüdafiəçisi premyer-liqada meydana çıxdığı 33 oyunda 22 qolun və 11 məhsuldar ötürmənin müəllifi olub.

Bu nominasiya üzrə digər namizədlər Foden, Holann (hər ikisi MS), İsak (Nyukasl), Kobbi Maynu (Mançester Yunayted), Vilyam Saliba, Bukayo Saka (hər ikisi “Arsenal”) və Destini Udoci (Tottenhem) idi.