“Vaşinqton”un rusiyalı hücumçusu Aleksandr Oveçkin MHL tarixinin ən yüksək ödənişli hokkeyçiləri sırasında birinci pilləyə yüksəlib.

Paytaxt klubunun kapitanı 2024/25 mövsümü nəzərə alınmaqla 149,2 milyon dollar qazanacaq. Ona qədər “Pittsburq”un kanadalı hücumçusu Sidni Krosbi 141,3 milyon dollar qazancla lider idi.

Şimali Amerika liqasının ən yüksək ödənişli oyunçularının ilk “3-lüy”ünə “Pittsburq”un digər hücumçusu Yevgeni Malkin də daxil olub. 38 yaşlı hokkeyçi karyerası boyunca 132,3 milyon dollar qazanıb. Rusiyalı ulduzun cari mövsümdəki qazancı 5,6 milyon dollar olacaq ki, bu da ona reytinqdə karyerasını bitirən Şi Ueberlə (129 milyon) Yaromir Yaqrı (128,1 milyon) arxada qoymağa imkan verəcək.

Xatırladaq ki, Oveçkin 2005-ci ildən “Vaşinqton”un şərəfini qoruyur. 39 yaşlı hücumçu müntəzəm çempionatın ötən mövsümündə keçirdiyi 79 oyunda 31 qol vurub, 34 məhsuldar ötürmə verib. Amma kapitan pley-offda keçirdiyi 4 oyunda heç bir məhsuldar hərəkətlə yadda qalmayıb.

Ümumiyyətlə, Oveçkin MHL karyerası boyunca 853 qol vurub, hazırda snayperlər siyahısında 2-ci pillədə qərarlaşıb. Ueyn Qretskiyə çatmaq üçün onun daha 41 qol vurması lazımdı.