“Bunu biz də bilirik və biz də bundan əziyyət çəkirik” – “Baku Sportinq” Sxadadze ilə razılaşdı
1-ci liqanın 4-cü turunda “Baku Sportinq” “Qəbələ”ni qəbul edib. Əyalət təmsilçisi səfər oyunundan inamlı qələbə ilə ayrılıb – 2:0.
Matçdan sonra “Qəbələ”nin baş məşqçisi Kaxaber Sxadadze belə meydanda oynamağın çətin olduğunu, komandanın öz oyununu göstərə bilmədiyini söyləyib.
Gürcüstanlı mütəxəssisin narazılığına “Baku Sportinq”in mətbuat xidməti rəhbəri Araz Əhmədov belə aydınlıq gətirdi:
“Bəli, qazonun vəziyyəti ideal deyil. Bunu biz də bilirik və biz də bundan əziyyət çəkirik. Ancaq unutmaq lazım deyil ki, 26 il istifadəsiz qalan bir meydançanı - həm də təbii ot örtüklü - normal vəziyyətə salmaq üçün zamana ehtiyac var. Qazon tam hazır olmadan rəqiblərimizi orda qəbul etməli olduq. Buna səbəb isə ev oyunlarımızı keçirdiyimiz Binə qəsəbə stadionunun təmirə bağlanmasıdı”.
ƏSƏD SEYİDOV
