İspaniya Kral Futbol Federasiyası Karlo Ançelottiyə qarşı intizam işi açıb.

Football-plus.az xəbər verir ki, buna “Real”ın baş məşqçisinin “Jirona” ilə oyundan (1:1) sonra hakim Mario Melero Lopeslə bağlı açıqlaması rəvac verib.

Referi 80-ci dəqiqədə Marko Asensionun cərimə meydançasında qaydanı pozduğu qənaətinə gələrək “Real”nın qapısına penalti təyin edib və Kristian Stuani hesabı bərabərləşdirib. Ançelotti həmin epizodda qayda pozuntusu olmadığını, topun Asensionun qoluna yox, sinəsinə dəydiyini bildirib. İtaliyalı mütəxəssis hakimlərin komandasına qarşı penalti uydurduğu fikrinə görə təxminən 2-4 oyunluq diskvalifikasiya oluna bilər.

“AS” qəzetinin məlumatında Madrid klubunun rəhbərliyinin hər hansı cəza ilə vağlı qərar qəbul ediləcəyi halda apellyasiya şikayəti verməyi planlaşdırdığı bildirilir. Bu işlə bağlı yekun qərar Qətərdə noyabrın 20-dən dekabrın 18-dək keçiriləcək dünya çempionatından sonra veriləcək.