"Kəpəz" Misli premyer-liqasının 7-ci tur matçında Tovuzda "Şamaxı"ya uduzdu - 0:2. Beləliklə, "sarı-göylər"in ardıcıl yeddinci məğlubiyyəti rəsmiləşdi.

Bilindiyi kimi, matç Azər Bağırovun baş məşqçi kimi Gəncə təmsilçisiylə birgə ikinci sınağı idi. Mütəxəssis komandasıyla ilk cəhddə "Araz-Naxçıvan"a uduzub - 0:1. Onun "qırmızı-ağlar"la macərası da xoş bitməyib. Xatırlayırsızsa, Bağırov naxçıvanlıların rəhbəri kimi keçirdiyi son 7 matçda qələbəyə həsrət qalmışdı. İndi durum daha çətindi. "Kəpəz"in nə büdcəsi qaneedici deyil, nə də futbolçularının səviyyəsi. Hətta mütəxəssis bəzi legionerləri əvəzedici heyətə göndərməklə fərqli oyunçulara şans verir. Lakin komandanın dadına nə azarkeş dəstəyi çatır, nə də məşqçi işi... Azarkeş demişkən, onlar "şirlər"lə oyunda klub rəhbərliyini istefaya səslədi. O başqa məsələ ki, İlqar Nadiri bununla bağlı addım atmaq istəmir. Heyətlər və baş məşqçilər dəyişsə də, sədrlə nəticələr dəyişmir.

"Kəpəz" növbəti turlarda müvafiq olaraq, "Zirə", "Neftçi", "Qarabağ" və "Turan Tovuz" ilə qarşılaşacaq. "Sarı-göylər"in bu rəqiblərlə qarşılaşmada şansı nə dərəcədə yüksəkdi? Hadisələri qabaqlamaq istəmirik. Yumşaq dildə deyə bilərik ki, gəncəlilər növbəti 4 matçda maksimum 1 xal qazanmağa qadirdi. Təbii ki, bir neçə gün ərzində möcüzəvi dəyişiklik baş verməsə...

Qısası, "Kəpəz" iri addımlarla 1-ci liqaya doğru hərəkətlənib. Azər Bağırov yağışdan çıxıb, yağmura düşüb. Azarkeşlərin üsyanı fayda vermir. Komanda isə getdikcə məğlubiyyətlərin psixologiyasına öyrəşir. Fəlakət "gəlirəm" desə də, "gedirəm" deyən yoxdu...

KƏNAN BAHADIR