Millimizin oyunları geridə qaldı. İndi yenidən premyer-liqamıza boylana bilərik.

Ona görə ki, bu gün keçiriləcək matçla 6-cı tura start veriləcək. Oyunu "CBC Sport" canlı yayınlayacaq.

Misli premyer-liqası
1-ci dövrə, 6-cı tur
13 sentyabr
Araz-Naxçıvan - Kəpəz 1:0 Bernardo Dias
"Araz-Naxçıvan"ın bu rəqiblə ev oyunlarının balansı: 2:+0=0-2, 1:3.
2023/24 - 0:1, 1:2.
Cəzalı: yoxdu.
"Futbol+"in proqnozu: 40-30-30.
Bakı, "Liv Bona Dea Arena". Saat 19.30.

Elmar Baxşıyevin komandası fasilədə keçirdiyi yoxlama oyununda "Sumqayıt"ı darmadağın etdi - 5:1. Əlbəttə, "kimyaçılar"ın məğlubiyyətlə bağlı özünəməxsus səbəbləri ola bilər. Birini biz təxmin edək: əsas qapıçı Mehdi Cənnətov yığmanın düşərgəsində idi. Yenə də bu, "Araz-Naxçıvan"ın qələbəsinin önəmini azaltmır. Görünür, "qırmızı-ağlar" yola yüksələn xətt üzrə davam edir. Hər halda, Muxtar Respublika təmsilçisi uğurları rəsmi matçlara daşımalıdı. Təbii ki, yüksək yerlər uğrunda mübarizəyə qoşulmaq istəyirsə... Sentyabrın 13-də "Kəpəz"lə qarşılaşacaq komanda, adətən, bu rəqibin öhdəsindən gələ bilmir. Son üç matçda "sarı-göylər"in qələbə qazanması da bunun göstəricisidi. Cümə günü durum fərqli olacaqmı? Mümkündü. "Qırmızı-ağlar" istər oyun tərzinə, istərsə də mövcud durumuna görə rəqibindən üstündü. İndi "doğma divarlar" amilindən də yararlanıb gəncəlilərə "diş göstərmək" olar. 

"Kəpəz"in düşərgəsindəki bulanıqlıqdan da xəbərdarıq. Hələ yeni baş məşqçi Azər Bağırov və köməkçilərinin komandada nə dərəcədə dəyişiklik etdiyini bilmirik. O başqa məsələ ki, "sarı-göylər"in çox ciddi islahatlara ehtiyacı var. İlk beş turda xal qazana bilməyən kollektiv birinci dövrəni qənaətbəxş nəticələrlə bitirməsə, qış fasiləsinə bel bağlamaq lazım gələcək. Bu isə mövcud problemlərin aradan qaldırılmasının yubanmasıyla yanaşı, fərqli çətinliklər yaradacaq. Gəncə publikasının Azər Bağırova ümidi böyükdü. Mütəxəssis "Kəpəz"i premyer-liqada saxlamaq istəyirsə, bilik və bacarıqlarını ilk matçdan etibarən danışdırsa, yaxşı olar. O, yəqin ki, həm də sabiq komandasına qarşı uğur qazanmaqla özünü sübut etmək istəyəcək.
Komandalar indiyə qədər 4 matçda üz-üzə gəlib. Bunların 1-də "Araz-Naxçıvan", 3-də "Kəpəz" qələbə qazanıb. Topların nisbətində "sarı-göylər" öndədi - 7:4.

KƏNAN BAHADIR