“Kəpəz” Misli premyer-liqasının 7-ci turunda “Şamaxı”nı qəbul edəcək.

Bilindiyi kimi, turnir cədvəlinin sonuncu pilləsində qərarlaşan komandanın qələbədən başqa yolu yoxdu. Əks halda, Gəncə təmsilçisinin durumu daha da çətinləşəcək.

“Football-plus.az”a daxil olan məlumata görə, “sarı-göylər” “şirlər”lə oyuna çox ciddi hazırlaşır. Onlar meydana məhz üç xal qazanmaq üçün çıxacaq. Yeni baş məşqçi Azər Bağırov bu məqsədlə məşq prosesinin məxfi saxlanılmasına qərar verib. Hətta azarkeşlər gündə iki dəfə məşq edən komandanı ziyarət etmək istəsə də, buna icazə verilməyib. Xatırladaq ki, “Neftçi”nin baş məşqçisi Roman Qriqorçuk və “Turan Tovuz”un çalışdırıcısı Kurban Berdıyev də mövsümlərarası fasilədə həmin taktikadan yararlanıb.

Azər Bağırovun bəzi futbolçuların performansından narazı qaldığını və həmin oyunçuları əvəzedici heyətə göndərəcəyini yazmışdıq. Onlardan ikisinin adına aydınlıq gəlib. Söhbət Redon Mihana ilə Keverton Markolinodan gedir. Böyük ehtimalla, “şirlər”lə matç bu futbolçuların özünü yaxşı tərəfdən göstərməsi üçün sonuncu şansı olacaq.

Xatırladaq ki, “Kəpəz” – “Şamaxı” oyunu bu gün, saat 17.00-da Tovuz şəhər stadionunda start götürəcək.

KƏNAN BAHADIR