Niderland yığmasının 30 yaşlı hücumçusu Memfis Depay azad agent statusu ilə Braziliyanın məşhur klublarından “Korintians”la müqavilə bağladı.

2026-cı ilin sonuna qədər qüvvədə olacaq müqaviləyə görə Depay bu müddətdə 11 milyon avro qazanacaq.

"Football-plus.az" xəbər verir ki, azad agentlər arasında top səviyyədə olanlardan idi

Memfis bütün yay boyunca dünyanın ən baha azad agentlərinin ilk “10-luğ”unda idi. “Atletiko” “transfermarkt”ın 10 milyon avro qiymət qoyduğu futbolçu ilə müqavilə müddətini uzatmadı. Belədə təcrübəli hücumçu yeni iş yeri axtarışına çıxdı.

Memfisin adı ən müxtəlif klublarla yanaşı çəkilirdi – İtaliya “Roma” və “İnter”indən tutmuş İspaniya “Rayo Valyekano”suna, hətta Rusiya “Spartak”ına qədər. Sonuncu variant zarafata bənzəyirdi. Belə usta hücumçunun qitə arenasından uzaqlaşdırılan ölkənin klubunda nə işi var ki?! Sadəcə, Depayın “qırmızı-ağlar”ın sabiq hücumçusu Kvinsi Promeslə dostluq etməsi bu variantın irəli sürülməsinə əsas vermişdi. Depay sonda Braziliyanı seçməklə çoxlarını təəccübləndirdi.

Memfisin yeni klubu elitada qalmaq üçün oynayır
Çox güman, yeni klubun seçimində maaş amili həlledici rol oynayıb – Braziliya mediasına inansaq, Memfisi saxlamaq “Korintians”a 70 milyon reala (11 milyon avroya yaxın) başa gələcək. Ancaq Depayı irəlidə ciddi sınaq gözləyir: Braziliyada mövsümün qızğın çağıdı, “Korintians” isə təhlükəli zonada qərarlaşıb. Həmin zonadan uzaqlaşmaq realdı, ancaq ciddi çalışmaq lazımdı.

Daha aşağı statuslu liqaya və kluba keçməsinə baxmayaraq, Depayın Niderland yığmasına yolu bağlanmayıb. Komandanın baş məşqçisi Ronald Kuman bir müddət əvvəl bəyan etmişdi ki, Səudiyyə Ərəbistanına yollanan Berqveyni yığmaya çağırmayacaq, ancaq Memfisə münasibətdə yumşaq davranır: “Berqveynin Səudiyyə Ərəbistanına yollanmasını dəstəkləmirəm, Depayla bağlı isə hər şey fərqli ola bilər. Braziliya çempionatının səviyyəsi fərqlidi. Odu ki, Depay hələ də yığmanın bir hissəsi ola bilər. Ancaq hər şey onun fiziki formasından və əvvəlki səviyyəsinə qayıdıb-qayıtmamasından asılı olacaq”.
Depay sonuncu Avropa çempionatında yığmanın keçirdiyi 6 oyunun hamısında göründü və bir qol vurdu. Niderlanlılar yarımfinala qədər irəlilədi. Memfis ötən mövsüm “Atletiko”nun heyətinə keçirdiyi 31 oyunda 9 dəfə fərqləndi.

Depay Braziliyadakı ilk avropalı deyil
Braziliyanın A seriyası son vaxtlar əməlli-başlı dəbə minib. İndi orda fransalı Dimitri Payet (Vasko da Qama), danimarkalı Martin Breytueyt (Qremio), irlandiyalı Camal Lüis (San-Paulu) və başqaları oynayır. Bəzi xəbərlər Antoni Marsyalı da Braziliyaya “göndərir” – “Mançester Yunayted”in sabiq oyunçusu “Flamenqo”nun maraq dairəsinə düşüb.

Braziliya çempionatındakı avropalılar
ad ölkə yaş Braziliyadakı klubu
Martin Breytueyt Danimarka 33 Qremio
Memfis Depay Niderland 30 Korintians
Maksim Dominges İsveçrə 28 Vasko da Qama
Dieqo Kosta* İspaniya 45 Qremio
Camal Lüis Ş.İrlandiya 26 San-Paulu
Dimitri Payet Fransa 37 Vasko da Qama
Lukas Piton* İtaliya 23 Vasko da Qama
Sisinyo* Bolqarıstan 37 Baiya
Tobiaş Fiqeyredo Portuqaliya 30 Krisiuma
Məhəmməd Əl-Aruş Fransa 20 Botafoqo
Ektor Ernandes İspaniya 28 Korintians
* - Braziliya ərazisində doğulub.

Onu da xatırladaq ki, Depay karyerası boyunca PSV, “Lion”, “Mançester Yunayted”, “Barselona” və “Atletiko” forması geyib. Bütün bu komandalarda toplam 151 qol vurub, 75 məhsuldar ötürmə verib. Niderland yığmasının heyətində 46 qol vuran hücumu Robin van Persidən sonra ikinci bombardirdi.