“Atletiko” rəhbərliyi Antuan Qrizmannın gələcəyi ilə bağlı qərar verib.

“Football-plus.az” xəbər verir ki, hücumçu yeni mövsümə də bu komandada başlayacaq.

İspanİya mənbələrinin yaydığı xəbərə görə, klub rəhbərliyi fransalı ilə əməkdaşlığı davam etdirmək qərarına gəlib. Tərəflər artıq yeni müqavilənin yekun detallarının müzakirəsinə başlayıblar. Antuanın hazırkı müqaviləsinin müddəti 2026-cı ilin yayına kimi nəzərdə tutulub. O, bu mövsüm 47 oyuna çıxıb, 24 qol vurub və 8 məhsuldar ötürmə edib. Qrizmannla Səudiyyə Ərəbistanından bir klubun maraqlandığı bildirilirdi.

Yeri gəlmişkən, “Atletiko”nun digər hücumçusu Memfis Depay yayda azad agent kimi klubu tərk edəcək. Bu barədə tanınmış insayder Fabritsio Romano sosial şəbəkə hesablarında məlumat verib. O, Madrid klubunun təcrübəli oyunçu ilə müqavilənin müddətini daha bir mövsüm uzatmaq imkanı olsa da, bundan istifadə edilməyəcəyini bildirib.

Xatırladaq ki, Depay paytaxt komandasında 2023-cü ilin yanvarından oynayır. 30 yaşlı futbolçunun klubu ilə müqaviləsinin müddəti 2025-ci ilin yayına kimi nəzərdə tutulub. Memfis yenicə sona çatan mövsümdə komanda ilə 31 oyuna çıxıb, 9 qol vurub və 2 məhsuldar ötürmə edib.