Bu gün mövsümün ilk “Qarabağ” – “Neftçi” matçında şahidlik edəcəyik. Artıq komandaların azarkeşləri arasındakı toqquşmalar başlayıb.

“Football-plus.az” xəbər verir ki, “köhlən atlar”ın “İmarət Tayfa” tərəfdar qrupu sosial şəbəkə hesabında yaydığı görüşə çağırış mesajında “Neftçi”ni “premyer-liqada qalmaq uğrunda mübarizə aparan klub” adlandırıb. Paylaşım “ağ-qaralar”ın “Forza Neftçi” fanklubunun qəzəbli bəyanat yaymasıyla nəticələnib. “Neftçi”li azarkeşlər konkret ad çəkməsə də, heç kimə komandayla məzələnməyə icazə verməyəcəyini bildirməklə yanaşı, öz klubuna xəbərdarlıq edib. Bildirilib ki, bu, bakılılar üçün sonuncu şansdı.

Qeyd edək ki, hər iki tərəfdar qrupu Azərbaycan derbisinə xüsusi hazırlıq işləri görür. Matçda diqqətçəkən plakatların açılması və cəlbedici şüarların səsləndirilməsi planlaşdırılır.

KƏNAN BAHADIR