Türkiyə basketbol çempionatının 2-ci liqasında yarışan “Çayırova Bələdiyyəsi”nin 34 yaşlı oyunçusu İlkan Karamanı sərxoş sürücünün sükanı arxasında olduğu avtomobil vuraraq öldürüb.

İlkan səkidə dayanaraq yanacaqdoldurma məntəqəsində olan dostunu gözləyirmiş. Çox güman, sərxoş sürücünün idarə etdiyi avtomobil idarəetməni itirərək səkiyə çıxıb və Karamanı vurub. Basketbolçu elə hadisə yerində keçinib.

İlkan karyerası boyunca ölkənin “Tofaş”, “Karşıyaka”, “Fənərbaxça” və “Beşiktaş” kimi məşhur klublarının şərəfini qoruyub. “Fənərbaxça”nın heyətində 2013-də ölkə kubokunu qazanıb, 2014-də isə ölkə çempionu olub. Həmçinin Türkiyənin gənclər yığmasının heyətində çıxış edib, əsas yığmanın heyətində isə AÇ-2013-ün seçmə mərhələsi çərçivəsində 8 oyuna çıxıb.

“Bruklin” MBA-nın 2012 draftında Karamanı 57 nömrə altında seçsə də, o bu komandanın heyətində heç bir rəsmi oyuna çıxmayıb.