Maurisio Poçettinonun yeni iş yeri müəyyənləşib.

O, karyerasında ilk dəfə Amerika qitəsində çalışacaq.
Argentinalı mütəxəssis ABŞ yığmasının baş məşqçisi təyin olunub. Yerli futbol federasiyasının saytının yaydığı məlumata görə, 52 yaşlı məşqçi milli komandanı 2026-cı ildə keçiriləcək dünya çempionatına hazırlayacaq.

Qeyd edək ki, iki ildən sonrakı mundial ABŞ, Kanada və Meksikada təşkil ediləcək. Yerli futbol qurumu ilə ikiillik müqavilə imzalayan Poçettino ABŞ yığmasının tarixinə ən ödənişli məşqçi kimi düşüb. Belə ki, onun illik məvacibi 6 milyon dollara bərabər olacaq. Maraq üçün Poçettinonun yeni komandasındakı sələfi Qreqq Berhalterin illik qazancının 900 min dollar bonusu da nəzərə almaqla 2,3 milyon dollar olduğunu xatırladaq.

Poçettinonun sonuncu iş yeri 2023-cü ilin yayından bu ilin mayına kimi çalışdığı “Çelsi” olub. O, daha əvvəl PSJ, “Tottenhem”, “Sauthempton” və “Espanyol”a başçılıq edib.