Avropa çempionatının seçmə mərhələsində 21 yaşadək futbolçulardan ibarət Azərbaycan millisi Şimali İrlandiyaya məğlub olub.

"Football-plus.az" xəbər verir ki, matçdan sonra yığmamızın çalışdırıcısı Samir Əliyev jurnalistlərin suallarını cavablandırıb. Sizi onun fikirləri ilə tanış edirik:

- Rəqib azlıqda oynadı. Niyə bu üstünlükdən istifadə edə bilmədiz?
- Əksinə, rəqib 10 nəfərlə qalanda bildim ki, bizim problemlərimiz olacaq. Çünki, daha çox qapandılar. Rəqibin Ukrayna və Lüksemburqla oyunlarını dərindən təhlil etmişdik. Oyunun əvvəllərində yaratdığımız qol vəziyyətlərindən və penaltidən istifadə etmək lazım idi. Bilmirəm, uşaqlarda bəlkə də həyəcan oldu.

- Penaltini öncə Fərid Yusifli vurmaq istəyirdi. Camal Cəfərov israr edərək topu götürdü. Komandanın əsas penaltiçisi kimdi?
- Fərid Yusifli yəqin ki, ona ürək-dirək verirdi. Bizdə penaltiləri Ramin Nəsirli və Camal Cəfərov vurur. Bu, futboldu. Ola bilir.

- Şimali İrlandiya üçüncü oyunda ilk qələbəsini qazandı. Biz nə vaxt qalib gələcəyik?
- Yəqin ki, oyuna baxdınız. Perspektiv gördüz? Bu qədər qol epizodları yaratdıq. Rəqibin Ukrayna ilə oyununu təhlil etmişdik. Ukrayna bu rəqiblə matçda bizim qədər qol epizodları yaratmamışdı. Sadəcə istifadə edə bilmədik.

- Komandada premyer-liqada oynayan futbolçular azdı. Bu, nəticəyə nə dərəcədə təsir edir?
- Çox dərinə getməyəcəm. Hər şey göz qabağındadı. Əlbəttə biz də istəyərdik ki, keyfiyyətli oyunçuların sayı çox olsun. Bu gün meydanda olanlardan yalnız Veysəl Rzayev, Abdulla Rzayev və Yusif İmanov premyer-liqada oynayır. Digərləri 1-ci liqada və əvəzedicilərin çempionatında çıxış edir. Buna baxmayaraq, Şimali İrlandiyaya qarşı pis futbol sərgiləmədik.

- Ağadadaş Salyanskini əvəzləməyinizin səbəbi nə idi?
- Daha çox yerlə oynamaq istədik. Rəqib "ikinci mərtəbə"də qoldan başqa təhlükəli vəziyyət yaratmadı. İndi çox şey demək olar. Soyuq başla səhvləri təhlil edəcəyik. Şimali İrlandiya ilə səfərdə də oyunumuz var. Bu rəqibə qarşı oynamaq və qalib gəlmək olar.

- Ardıcıl iki məğlubiyyət üçüncü oyunda problem yaratmayacaq?
- Bu oyunu qısa bir vaxtda unudub futbolçarı psixoloji cəhətdən hazırlayıb yaxşı nəticəyə ümid edəcəyik.

- Buraxılan qolda Yusif İmanovu günahlandırırsız?
- Xeyr. Orda Ağadadaş Salyanski oynamalı idi. Təəssüf ki, "yatdı".

- Lüksemburqa qarşı oynamaq mümkün olacaq?
- Hər rəqibə qarşı oynamaq mümkündü.

- Oyundan sonra baş verən insident haqda nə deyə bilərsiniz?
- Əlbəttə ki, kapitan elə hərəkət etməməlidi. Bu da məğlubiyyətin acısıdı. Futbol emosiya oyunudu. Buna baxmayaraq, futbolçulara hər dəfə tapşırırıq ki, davranışlarına diqqət etsinlər. Yenə də söhbət edəcəyik. Məğlubiyyəti də bacarmaq lazımdı. Üzgünük. Həm qol vura bilmədik, həm xal qazana bilmədik. Ümid edirik ki, Lüksemburqla oyunda üç xal qazanacağıq.