“Demək olar ki, heyəti tam formalaşdırmamışam. Bəzi futbolçuların sənədləri tam hazır deyil. Ötən oyunda 6 əsas heyət üzvünün yoxluğu, 5 saatlıq yol yorğunluğu və s. amillər oldu. Rəqib də şanslı idi. Düzdü, onların əziyyətini yerə vurmaq istəmirəm, amma biz həddən artıq bərbad oynadıq, rəqibə fürsətlər yaratdıq. O nəticəni unutmaq lazımdı. Növbəti oyunlar üçün heyəti formalaşdırmalıyıq. Ötənilki uşaqlarla yola davam edəcəyik. Əsas problemimiz büdcə sarıdandı. Yeganə gəlir yerimiz AFFA-dan ayrılan puldu. Ümidimiz 5000 manat puladı ki, onun 1100 manatı vergiyə çıxılır, qalan 3900 isə stadion, səfər… Bu üzdən əsas futbolçuları oyundan-oyuna çağıra, bəzən səfərə də apara bilmirik. Rəhmanın çevrəsi geniş idi, birtəhər həll edirdi, biz isə çarəsiz qalmışıq. Ailəsinə də nəsə deyə bilmirik. Gözləyirik ki, 40 mərasimi olsun. Daha sonra Rəhmanın qardaşı klub prezidenti kimi onun vəzifələrini icra edəcək. Hətta çempionatın başlamasına tam 4 gün qalanda biz sənədləri hazırlayıb, 2-ci liqada iştirakımızı təsqiqləyə bildik. O zaman da AFFA bizə dəstək oldu, klub prezidentinin imzalamalı olduğu yerləri müvəqqəti boş qoyduq. Sənəd işləri ilə bağlı həyatım boyunca belə vəziyyətlə rastlaşmamışdım. Burdakı uşaqların da, mənim də məqsədim Rəhmanın xatirəsini yaşatmaq, klubu qorumaqdı. Bunun üçün söz vermişik ki, bir il heç yerə getməyəcəyik. 14 komanda arasında yalnız bizik belə durumda olan. Bu il çox çətindi. Ümid edirəm ki, kluba sahib çıxan olar. Bildiyimə görə, qardaşıyla əlaqə saxlayanlar var. Bu ay yenilik olmasa, gələn ay AFFA-dan dəstək istəyəcəyik. Ümid edirəm ki, qurum bizi bu vəziyyətdə qoymaz, maddi dəstək göstərər. Sonuncu oyunda heç-heçə olsaydı, qalib gəlsəydik belə, bu problemləri dilə gətirəcəkdim. Bəhanə deyil, nəticələrin də bizim üçün böyük önəmi yoxdu. Futboldu, əsas istəyimiz rayon komandasını bu acınacaqlı vəziyyətdən çıxarmaqdı”.