“Rəhman ilk dəfə 2016-cı ildə təşəbbüs göstərmiş, əlaqə saxlamışdı. Ağdaşda klub/komanda quruculuğu, AFFA və PFL ilə bağlı əlaqələrdə məsləhətə ehtiyacı olduğunu bildirmişdi. Xeyli yazışmışdıq... Federasiya rəhbərliyi ilə görüşə hazırlaşırdı. Maliyyə imkanları önəmli olsa da, hər şey puldan asılı deyil. Futbol sevgi, fədakar insanlar üzərində qurulur, bu hisslər olmadan istənilən effekti verməz, faydalı iş qurula bilməz. "Ağdaş" Rəhmanla birgə ildən-ilə böyüyürdü, təcrübə toplayırdı... Rəhman Əliyev qısa ömründə təmənnasız fəaliyyəti ilə futbol ictimaiyyətinin sevgisini qazandı. Rəhman və futbol münasibətləri - qarşılıqlı sevgi üzərində qurulmuşdu. Klubun rəhbəri də, fəhləsi də özü idi. İsti yay axşamında, suyu qurumuş ölkə futbolunda, su amansız ölümlə suyuşirin Rəhmanı apardı, Ağdaş futbolu başsız qaldı... Rəhman Əlıyevin qurduğu, yaratdığı iş davam etdirilməli və müvafiq qurumlar, rayon rəhbərliyi bu yolda köməyini əsirgəməməlidi. Bu, futbol sevgisi tükənməz olan Rəhman ruhu qarşısında ən böyük təsəlli olar... Allah rəhmət eləsin”.

“Rəhman Əliyevin faciəvi ölümü hamımızı kədərə boğdu. Rəhman yaxşı dost, səmimi və zəhmətkeş oğlan idi. Öncə inanmadım, sonradan öyrəndim ki, bibisi oğlunu xilas edərkən onunla birgə boğulub. Rəhman hər kəslə mehriban idi. Uşaqdan böyüyə hamı onu çox istəyirdi. Ötən ay danışmışdıq ki, gəlib yoldaşlıq oyunu keçirəcəyik. Tez-tez deyirdi gəl, qismət olmadı... Ağdaş da həm uşaqlardan ibarət komandanın, həm də 2-ci liqa komandasının təsisçisi və məşqçisi idi. Ağdaş futbolunu təkcə çiynində daşıyırdı. Ruhu şad olsun. Həmişə xatirəmizdə qalacaq”.

“Sonuncu dəfə bir həftə əvvəl görüşmüşdük. İstirahətdə olduğumuzdan əvvəlki kimi sıx-sıx görüşə bilmirdik. Qəbələdə şəhidlərin xatirəsinə həsr edilən turnir təşkil etmişdim, ora Ağdaşdan uşaqlar gətirmişdi. Oyunçu kimi turnirdə qalib gəldi, hətta boynundan medal asdım. Srağagün isə telefonla danışmışdıq. Dünən səhər saat 11-də “Sabah”ın əvəzedici komandasıyla yoldaşlıq oyunu vardı. Bizim üçün də seçim xarakterli idi. Telefonla axşamtərəfi danışdıq, dedi evə gedib görüntülü zəng vurarsan. İşim oldu, evə saat gecə saat 3-ə 20 dəqiqə işləmiş gedirdim ki, mənə voasapla görüntülü zəng vurub. İnternetim olmadığına görə 2.23-də telefon zəngi etdi. Danışdım, dedim ki, “Rəhman, evə çatıram, görüntülü zəng vuracam”. Evə çatıb yemək yedim, saat 4-ə qalırdı. Düşündüm daha yatmış olar, onsuz da səhər Qəbələdə görüşəcəyik. Həm də tez durmalıydıq... Dəfnində futbol adamlarının əksəriyyəti vardı. “Qəbələ”nin prezidenti Fariz Yusifov, hakim Rəvan Həmzəzadə, hakim-inspektor Rövşən Əhmədovu gördüm. Rəhman kimi oğullar dünyaya tək-tük gəlir. Klubla bağlı çox planları vardı, amma reallaşdıra bilmədi. Qəhrəman kimi gəldi, yaşadı, qohumunu xilas edərkən də qəhrəmancasına həlak oldu. Allah ailəsinə səbr versin”.