Millimiz bu gün Millətlər Liqasının C liqasında növbəti matçını keçirəcək.

"Football-plus.az" xəbər verir ki, qrup mərhələsinin ikinci tur sınağında rəqib Slovakiyadı. Matç “CBC Sport”la canlı yayınlanacaq.

Millətlər Liqası
qrup mərhələsi, 2-ci tur
Slovakiya – Azərbaycan 2:0
A.Duda - 22-p. David Streleç, 26.
Hakimlər: DAMİAN SİLVESTRYAK, Pavel Sokolniçki, Adam Karaseviç, Martsin Koçanek.
Koşitse, “Koşitse” Futbol Arenası. Saat 20.00.

Etiraf edək ki, millimiz ilk oyunda qənaətbəxş çıxış etdi. Görüş ərzində tempin aşağı düşməməsi, hər iki komandanın hesabdan asılı olmayaraq bir-birinin ardınca hücumlar etməsi izləyicilərə zövq verdi. Əlbəttə, məğlubiyyət acıdı. Lakin bu, qarşılaşmanın əzmkar mübarizə şəraitində keçdiyinə şübhə yaratmır. Səhvlər də oldu. Ramil Şeydayevin sözün əsl mənasında özbaşınalığı, Emin Mahmudovun buna etiraz etməməsi ümumi ab-havaya xələl gətirdi. Rəqibin isə məhz təcrübə və keyfiyyət cəhətdən üstün olması matçın taleyini həll etdi. Yox-yox, bunları vacib oyun ərəfəsində ruh düşkünlüyü yaratmamaq məqsədilə yazmırıq. Reallıq budu. Əlbəttə, qüsurlar çoxdu. Amma demək olar ki, motivasiyasız oyunda belə performansı qiymətləndirməmək olmaz. O başqa məsələ ki, buna yeganə səbəb Millətlər Liqasıyla bağlı konkret hədəfin olmamasıdı. Bəs nə edək? Slovakiyaya da uduzaq? Qətiyyən! Millimiz səfər matçından qələbəylə dönməklə böyük motivasiya qazanmaqla yanaşı, ilk oyundan sonra gələcəyə yaranan ümidi bəsləməlidi. Təbii ki, baş məşqçi Fernando Santuşdan birinci ya ikinci cəhddən xarüqələr yaradacağını gözləmək absurddu. Çoxu qəbul etmək istəməsə də, problemimiz baş məşqçilərlə bağlı deyil! Qələbəyə köklənmək üçün səbəb də var. Qrupun əsas favoriti İsveçdən xal ala bilmədiksə, Slovakiyadan möhkəm yapışmalıyıq. Onsuz da Millətlər Liqasının 2022/23 mövsümündə bu rəqibə evində qalib gəlmişik. 2022-ci il sentyabrın 22-də Trnavada keçirilən oyun meydan sahiblərinin 1:2 hesablı məğlubiyyəti ilə bitmişdi. İndi yenidən üz-üzəyiksə, uğuru təkrarlamağa çalışmalıyıq. Əlbəttə, Slovakiyanın gücləndiyindən xəbərdarıq. David Hantsko, Milan Skrinyar, Stanislav Lobotka kimi görkəmli futbolçuların şərəfini qoruduğu yığma AÇ-2024-ün 1/8 finalına qədər irəliləyib ki, İngiltərəyə son dəqiqələrdə buraxdığı qollar üzündən məğlub olub. Françesko Kaltsonanın çalışdırdığı komanda bu turnirdə də yetərincə iddialı olacaq.

Millimiz Slovakiyada dəstəksiz olmayacaq. Komandanı 40-50 azərbaycanlının dəstəkləyəcəyi gözlənilir. Çatışmazlıq isə Bəhlul Mustafazadənin zədə üzündən heyətdən çıxarılmasıdı. Yəqin ki, onu ya Rahil Məmmədov, ya da Amin Seydiyev əvəzləyəcək.

Yeri gəlmişkən, dünən saat 16.30-da vətəni tərk edən yığma 3 saat 40 dəqiqəlik uçuşun ardından – saat 20.10-da Koşitseyə çatıb. Hava limanındakı texniki nasazlıq üzündən futbolçuların, eləcə də nümayəndə heyətinin bütün üzvlərinin pasport nəzarətindən keçməsi ləngiyib. Bakıda saat 22.00-ı göstərəndə artıq yığma üzvləri otelə çatıb. Ümid edirik ki, bütün bunlar sabahkı oyunun axarına təsir göstərməyəcək və yığma vətənə xalla dönəcək.

KƏNAN BAHADIR