“Liverpul” iki transfer əməliyyatını reallaşdırıb. İngiltərə nəhəngi italyan və gürcü futbolçunun keçidinə nail olub.

“Liverpul” bu yay “Yuventus”un transferə çıxardığ Federiko Kyezanın keçidini rəsmiləşdirib. İngiltərə klubunun saytının yaydığı məlumatda 26 yaşlı hücumçu ilə uzunmüddətli müqavilənin imzalandığı bildirilib. Lakin sözləşmənin digər detalları açıqlanmayıb.

Kyeza “Yuventus”da 2020-ci ilin yayından çıxış edirdi. O, bu komandada 131 oyun keçirib, 32 qol vurub və 23 məhsuldar ötürmə verib. İtaliya yığması ilə 2021-ci ildə keçirilən Avropa çempionatının qalibi olan Federiko turinlilərin yeni baş məşqçisi Tyaqo Mottanın planlarına daxil olmadığı üçün transferə çıxarılmışdı.

“Liverpul” Georgi Mamardaşvlinin keçidini də həll edib. Gürcüstan yığmasının 23 yaşlı qapıçısı cari mövsümdə “Valensiya”da oynamağa davam edəcək və “Liverpul”a gələn yay qoşulacaq. Georgi İspaniya klubunda 2022-ci ilin qışından çıxış edir. O, ötən müddət ərzində bütün turnirlərdə 102 oyun keçirib və 31 matçda qapısını toxunulmaz saxlayıb. Bu yay Almaniyada təşkil edilən Avropa çempionatında əla təsir bağışlayan Mamardaşvilinin ötən mövsüm bütün turnirlərdə 37 oyuna 34 qol buraxdığını da bildirək.