"Neftçi" Misli premyer-liqasının səfərdə keçirilən 5-ci tur matçında "Şamaxı"nın öhdəsindən gələ bilmədi - 0:0.

"Football-plus.az" xəbər verir ki, "ağ-qaralar"ın baş məşqçisi Roman Qriqorçuk matçdan sonra keçirilən mətbuat konfransında jurnalistlərin suallarını cavablayıb.

- Bəllidi ki, nəticədən razı qalmadız. Bəs, oyundan razısızmı?
- Bəli, nəticədən razı deyiləm. Oyuna gəlincə, futbolçuların çoxu komandaya yeni gəlib. Hələ uyğunlaşma problemi var.

- Əvvəlki oyunlarla müqayisədə bu dəfə hansı irəliləyiş hiss etdiz?
- Fərq böyükdü. Oyun zamanı çoxlu qol epizodu yaratsaq da, hesabı aça bilmədik.

- "Neftçi" beş oyunda iki qol vurub. Bu mövzu və milli fasiləylə bağlı fikirləriniz necədi?
- Dediyim kimi, qol epizodları yaratdıq. Lakin hesabı aça bilmədik. Fasilə bizim üçün çox vacibdi. Komandanın komplektləşməsinə və futbolçuların uyğunlaşmasına çalışacağıq. Fərqli problemlər də var ki, hamısını aradan qaldırmaq üçün əlimizdən gələni edəcəyik. İstəyirik ki, sərt hücum futbolu oynayaq.

- Düzdü, komandaya vaxt lazımdı. Lakin Avropada adətən belə proseslər erkən tamamlanır. Durumun daha tez yaxşılaşmasına nə mane olur?
- İndiki heyətlə yay təlim-məşq toplanışına başlasaydıq, komanda indi 300 faiz hazır olardı. Şükürlər olsun ki, düzgün idarəetmə və yanaşmanın içindəyik. Bir neçə oyunçumuz da zədəlidi.

- Milli fasilə komandanın tam hazır olması üçün yetərli olacaq? Yoxsa daha çox vaxt lazımdı?
- Əminliklə deyə bilərəm ki, fasilədən sonra daha yaxşı olacağıq. Amma bunun hansı səviyyədə olacağını dəqiq deyə bilmərəm. Hadisələrə emosional yanaşmamalıyıq. Gördüklərim daha güclü olmağıma kömək edir.

KƏNAN BAHADIR