Fərdi Kadıoğlunun “Fənərbaxça” macərası başa çatdı. İstedadlı futbolçu hələ iki həftə əvvəl “Lill” ilə cavab oyununa çıxmayanda bəlli idi ki, bu iş yalnız transferlə bağlıdı.

O, “Brayton”la həmin vaxtdan anlaşmışdı. Klublar arasında anlaşma isə yalnız ötən cümə günü baş tutdu. Həmin gün Türkiyə yığmasının üzvü transferin son detallarını müzakirə etmək və tibbi müayinədən keçmək üçün İngiltərəyə yollandı. Qəzet çapa gedərkən bu transfer hələ tam açıqlanmamışdı. Ona görə də rəqəmlərdə dəyişiklik ola bilər. Həm Türkiyə, həm də İngiltərə mənbələrinə inansaq, “Fənərbaxça” bu satışdan bonuslarla birlikdə 35 milyon avro qazanacaq. Bu məbləğdə bir dəyişiklik olmasa, Türkiyə futbolunda satış rekordu təkrarlanacaq. Çünki bu ilin martında Saşa Boe də həmin məbləğə (30+5 milyon avro) “Qalatasaray”dan “Bavariya”ya yollanmışdı. Amma yerli futbolçular üçün bu, yeni rekorddu. Əvvəlki rekord 2018-in yanvarında 22,5 milyon avroya “Beşiktaş”dan “Everton”a yollanan Cenk Tosuna məxsus idi. Qeyd edək ki, “Fənərbaxça” Fərdi Kadıoğlunu 2018-in yayında cəmi 1,4 milyon avroya “Neymegen”dən transfer etmişdi. Ona görə də “sarı-lacivərdlilər” həmin dönəmdə imzalanan müqavilənin şərtlərinə əsasən əldə olunacaq məbləğin 10 faizini Niderland təmsilçisinin hesabına köçürəcək. Türkiyə yığmasının heyətində AÇ-2024-də sərgilədiyi inamlı oyunla dəyərini bir qədər də artıran Fərdi “Mançester Yunayted”in də hədəfində idi. Amma “Brayton”un almaniyalı baş məşqçisi Fabian Hürtselerin israrından sonra ingilislər “Fənər”in istədiyi məbləği ödəməyə razılıq verdilər. Kadıoğlu İstanbul nəhəngində yalnız 1 titul – 2023-cü ildə ölkə kubokunu qazana bildi və 203 rəsmi oyuna çıxaraq 18 qol, 22 məhsuldar ötürməlik performans sərgilədi. Onun “Brayton”la “5+1” illik müavilə imzalayacağı, illik qazancının isə 3,5 milyon avro olacağı gözlənilir.

Türkiyədə yay transfer dönəmi sentyabrın 13-də başa çatacaq. “Fənərbaxça”nın həmin tarixə qədər Fərdinin boşluğunu hansı futbolçu ilə dolduracağı maraqla gözlənilir. Bir müddət öncə Türkiyə mətbuatında Serxio Regilonun adı hallanırdı. Bu futbolçu Mourinyoya gözəl tanışdı. İspaniyalı sol müdafiəçi 2020-də məhz Mourinyonun tələbi ilə “Tottenhem” tərəfindən transfer edilmişdi. Ən son xəbərlərdə “Fənər”in “Ayaks”ın sol müdafiəçisi Ouen Viyndala maraq göstərdiyi deyilir. “Habertürk”ün məlumatına görə Amsterdam nəhəngi 24 yaşlı futbolçuya görə 12 milyon avro tələb edir. “Alkmaar”ın yetirməsi olan və “Ayaks”a 2022-də 10 milyon avroya transfer edilən futbolçu ötən mövsümü icarə əsasında “Atverpen”də keçirmişdi. Bu mövsüm heç bir rəsmi oyuna çıxmayan və başqa klubların da maraq dairəsində olan Viyndalın “Ayaks”la 2027-yə qədər müqaviləsi var.