“Zirə” Nikosiyadakı acı məğlubiyyətin ardından bazar günü “Şamaxı”ya da uduzdu - 0:1.

“Qartallar”ın legionerlərindən Junior Martins oyundan sonra “Futbol+”in suallarını cavabladı.

- Əvvəlcə oyun barədə fikirlərinmi bildirərdin. Məğlubiyyəti nəyə bağlayırsan?
- Azərbaycanda hər oyun gərgin keçir. Bu gün bizdə alınmadı. Qol fürsətlərindən yararlana bilmədik. Bələ olanda rəqib cəmi bir qol epizodu yaradır və ondan maksimum dərəcədə faydalanır. Sonradan isə nəticəni dəyişmək mümkün olmur. Ümumilikdə mövsümə yaxşı başlamışdıq. Avrokuboklarda uğurlu çıxışımız davam edirdi. Bəzən futbolda belə hallar olur.

- Azərbaycanda oyunların gərginliyini klubların səviyyəsi ilə əlaqələndirirsən, yoxsa başqa dəlilin var?
- Təbii ki, Azərbaycanda futbol ildən-ilə daha fərqli səviyyəyə çatır. Bütün klublar daha yaxşı transferlər edir, daha yaxşı futbol sərgiləməyə çalışır. Bu da çempionatda rəqabəti artırır. Keyfiyyətli futbolçularımız var. Bu gün bizdə alınmadı. Düşünürəm ki, "Qarabağ"la yanaşı, "Zirə" də çempionluğa iddialı komandalar arasındadı. Bizim də öz iddiamız var.

- "Omoniya" ilə oyunda 0:6-ya nə səbəb oldu?
- Meydana çıxana qədər heç vaxt böyük hesabla məğlub olmaq, ümumiyyətlə, məğlub olmaq haqda düşünmürdük. Qələbə istəyirdik. Ən azı heç-heçə bizim üçün məqsədəuyğun olardı. Amma uduzmağı heç düşünmürdük. Təbii ki, "Omoniya"nın da haqqını yeməyək, böyük klubdu, çox yaxşı futbol sərgiləyirlər. Çətin görünsə də, ikinci oyunumuz var. Evdə oynayacağıq. Təbii ki, hər şey ola bilər. Bu, Allahın əlindədi.

- Həm də "Zirə" öz futbolunu oynamırdı. Bu qeyri-sabitlik nə ilə bağlıdı?
- Az öncə qeyd etdiyim kimi qalıb də gələ bilərsən, məğlub da olarsan, heç-heçə də qeydə alına bilər. Bundan heç kim “sığortalanmayıb”. Futbolda hər nəticə qeydə alına bilər. Sadəcə, daha çox işləməli, önümüzdəki oyunlara baxmalıyıq.

- Burdakı oyuna hansı motivasiya ilə hazırlaşırsız?
- Əlimizdən gələni etməyə çalışacağıq ki, ən azı evimizdə qələbə qazanaq. Heç kim məğlub olmaq istəməz.

RÖYANƏ OĞUZ