"İlk hədəfimiz avrokuboklara vəsiqə qazanmaqdı" - Rəşad Sadıqov
Premyer-liqanın 23-cü turunda "Zirə" "Səbail"i məğlub edib - 2:1.
Derbidən sonra "qartallar"ın baş məşqçisi Rəşad Sadıqov media mənsublarının önünə çıxıb.
Gənc mütəxəssis qələbə haqda fikirlərini səsləndirdən sonra jurnalistlərin suallarını cavablandırıb...
Yaxşı komandaya qarşı oynadıq. Meydanda da bu göründü. İlk hissə həm oyun, həm nəticə baxımından daha yaxşı alındı. Fasilədən sonra fərqi artırmaq istəyirdik. Ki, sonluq daha rahat olsun. Qol imkanlarımız var idi. “Səbail” elə komandadır ki, hesab böyük olanda da mübarizə aparır. Nə lazımdısa, onu etməyə çalışdıq. Oyun nəzarətimizdə idi. Son dəqiqələrdə səhvə yol verdik. Ümumən, yaxşı oyunlarımızdan birini keçirdik.
- 2-ci qoldan sonra komandanın dayanması nə ilə bağlı idi: rahatlıq, yoxsa “Neftçi” ilə kubok oyununu fikirləşmək?
- Qətiyyən o barədə düşünmürdük. Futbolçular böyük stress altındadı. Bütün komandalarda bu, hiss olunur. Ramazan ayıdı, oruc tutan futbolçularımız çoxdu. Bu, onların fiziki formasına təsir edir. 2:0 sürüşkən hesabdı, fərqi artırmaq istəyirdik. Amma oyun elə getdi ki, sona qədər heç kimə istirahət verə bilmədik. Coşqun vərəqə limitindədi, onu bir az qoruya bildik. Bəzən verdiyin qərarlar qeyri-standart olur. Futbolçunun mövcud durumunu bilmək çətindi. Düz bildiklərimizi etməyə çalışacağıq. Rahatlaşmaq fikri yox idi. Qol imkanlarımız oldu, hətta qol da vurduq, oyundankənar vəziyyətə görə sayılmadı. Şükürlər olsun, qəza baş vermədən vacib oyunda qələbə qazandıq.
- Mövsümün ilk yarısında komanda daha çox qol vururdu. Volkov da çoxdandı fərqlənmir. Sanki top ona çox çatmır...
- Sualla razı deyiləm. Davitə top gəlmir ki?
- Sanki “qol orucundadı”...
- Sizinlə razı deyiləm. Bu gün rotasiyalar etmişdik. Çempionat boyu buna gedirik. Davit aparıcı futbolçularımızdandı. Həmişə qol vurmaq olmur. Hücumçuları nəzərə alsaq, çempionatda bütün hücumçular maksimum bu qədər qol vurub. 4 oyundan 3-nü səfərdə keçirmişik və yetərincə qol imkanı yaratmışıq. Bu da futbolun bir hissəsidi. Əsas odu ki, oyun planında problem olmasın. Son oyunlarda komanda yaxşı çıxış etmişdi. Bu gün də göstərilən futbol həmin oyunların davamı idi. Nəticə çox vact oyun göstəricisi olmur. Ən əsas futbolçuların performansına diqqət edirəm.
- Təmkin Xəlilzadənin oynamama səbəbi nə idi?
- 4-5 gündən bir oyuna çıxırıq. Elə şeylər var ki, açıqlaya bilmirəm. Çünki rəqiblərə məlumat vermiş oluram. Hər bir futbolçu mənim üçün aparıcıdı. Rotasiyalar daha çox olacaq. Sıx qrafikdə rotasiyalar etməyə məcburam.
- Məqsədiniz gümüş medallardı, yoxsa 3-cü yeri qoruyub saxlamaq?
- Hər hansı planımız yoxdu. İdman elə bir şeydi ki, nəyəsə proqnoz vermək mümkün deyil. Mövsümdən öncə hədəf avrokubok idi. İndi şans varsa, daha artığını istəyə bilərik. Gedişatdan çox şey asılıdı. İlk hədəfimiz avrokuboklara düşməkdi. Necə olmasının fərqi yoxdu. Bəlkə, avrokuboklardan da kənar qalacağıq. Nə olacağını hələ bilmirik.
- İndi sizə nəticə daha vacibdi, yoxsa oyun planında inkişaf?
- Oyun fəlsəfəmiz var və onu komandaya yeritmək istəyirik. Təbii ki, nəticəni fikirləşirik. Amma öz yolumuz var və birdən-birə bunu dəyişə bilmərik. Demirəm ki, bütün oyunlarımızda buna sadiq qalacağıq. Amma sırf nəticəni fikirləşmək əlavə psixoloji problem yarada bilər.
Digər xəbərlər
