Bu həftə Konfrans Liqasında üzümüzü güldürən komandalardan biri “Zirə” oldu.

“DAK 1904” ilə qarşılaşan “qartallar” darmadağınla yadda qaldı - 4:0. Qollardan birinin müəllifi Junior Martins “Football-plus.az”ın suallarını cavablayıb.

- Oyun necə keçdi, əvvəlcə təəssüratınızı öyrənmək istərdim.

- Əla oyun oldu, qələbə qazandıq. Cavab görüşündə də eyni diqqəti və konsentrasiyanı qoruyacağıq.

- Bu nəticə çoxları üçün gözlənilməz oldu. “Şerif”ə məğlubiyyətdən sonra bu oyuna toparlanmaq çətin olmadı ki?

- Son oyundakı məğlubiyyət hamımız üçün üzücü oldu. Amma biz o məğlubiyyətin təsirindən çıxa bildik və bütün diqqətimizi “DAK 1904” ilə oyuna cəmlədik. Göründüyü kimi, evdə - azarkeşlərimiz qarşısında yaxşı performans nümayiş etdirdik.

- 4:0 hesablı qələbədə həlledici amil nə oldu?

- Məşqçimiz bizə oyun planı verdi. Şükürlər olsun ki, yaxşı iş gördük, gözəl qələbə qazandıq. Oyunun əvvəli bir az çətin keçdi, amma sonradan nəzarəti ələ alıb, qələbəni təmin edə bildik. Rəqibimizi çox yaxşı təhlil etmişdik. Daha 90 dəqiqəmiz var. İnanıram ki, növbəti mərhələyə vəsiqəni təmin edəcəyik.

- “Şerif”ə məğlubiyyətdən sonra komanda çox tənqid olundu. Bu tənqidlər sizi ruhdan salmadı?

- Məğlubiyyətə üzüldük, amma ruhdan düşmədik. Çünki bizi onsuz da çətin oyun gözləyirdi. Peşman olmağa vaxt yoxdu.

RÖYANƏ OĞUZ