“Zirə” Konfrans Liqasının ilk pley-off oyununda səfərdə “Omoniya”ya elə hesabla uduzdu ki, cavab görüşü ilə bağlı nikbin düşünmək üçün əsasım yoxdu. Əlbəttə, bu məğlubiyyət ölkə futbolu adına üzücü haldı.

Hadisələrə vaxtından əvvəl münasibət bildirmək əslində doğru olmasa da, necə deyərlər, deməsəm, ölləm. Təbii ki, “DAK 1904”, “Osiyek” kimi rəqibləri məğlub edub Konfrans Liqasının pley-offuna yüksəlmək asan məsələ deyil. Deməli, “Zirə”nin gücü var. Elə içimi gəmirən də budu. Bu mərhələdə zəif komandalar olmur. Hamısı müəyyən süzgəcdən keçir.

Təəssüf ki, “Zirə”nin nümunəsində bunun əksini gördük. “Qartallar”ın meydanda sərgilədiyi oyun belə anlaşılmırdı. Hər 3-4 ötürmədən sonra top itkisi, ardıcıl səhvlər bura qədər yüksələn komandaya yaraşmadı. Əminliklə deyə bilərəm ki, futbol ictimaiyyətinin “qartallar”dan gözləntisi yüksək idi. Futbolda məğlubiyyətlər, səhvlər qaçılmazdı. Amma bir komanda 90 dəqiqə ərzində nə qədər belə vəziyyətə düşər? Yeni mövsümə uğurlu başlayan, həm avrokuboklarda, həm də çempionatda inamlı təsir bağışlayan Rəşad Sadıqovun yetirmələrinə belə oyun sərgiləmək yaraşmır. Matçboyu komandanın doğru-düzgün hücuma çıxdığını görmədik. Axı istədiyimiz “Zirə” bu deyildi. Sanki komandanın bütün heyəti yenicə yığılmışdı, futbolçular iriylə anlaşa bilmirdi. Oyuna daha yaxşı hazırlaşmaq üçün 3-cü turun “Araz-Naxçıvan”la görüşünün təxirə salınması da heç bir fayda vermədi.

Doğrudu, komandanın bir çox oyunçusu bəlkə də ilk dəfə pley-off mərhələsində iştirak edirdi. Ancaq bu amil də müdafiədə heç nədən top itirməyə və ya rəqib hücumu zaman yuxulamağa, diqqətsiz davranmağa əsas vermir. Görünən odu ki, Sadıqov yetirmələrinə bu matçın önəmini yetərincə aşılaya bilməmişdi. Həm mental, həm də fiziki baxımdan belə görünürdü. Cavab görüşünə gəlincə, heç də nikbin düşünmürəm. Hər şey baş verə bilər. Ancaq “Zirə”nin növbəti mərhələyə adlamaq şansı qalmayıb. Növbəti qarşılaşma formal xarakter daşıyacaq. Nə etmək olar…

“Sabah”ın səfərdə Hayfa “Makkabi”siylə görüşdə gözlənilməz qələbəsindən sonra avrokuboklarda nümayiş etdirdiyi futbol bizi məyus etdirdiyi kimi, “qartallar”ın da KL-nın qrupuna yüksəlməyin astanasında belə nəticə və meydanda göstərdiyi oyun çempionatımızın səviyyəsinin nə yerdə olduğunu göstərir. Deməli, biratımlıq barıtımız var imiş.

Udmaq da, uduzmaq da normaldı. Sadəcə, futbolçuların meydanda rəqib bir yana, özü-özü ilə mübarizə aparması biabırçılıqdı. Yenə də əlimizdən dua və ümid etməkdən başqa bir şey gəlmir. Bakıdakı oyunun nəticəsindən asılı olmayaraq, ən azı komandanın normal oyun sərgiləməsini istəyirəm. Daha Nikosiyadakı kimi yox!

KAMAL SƏFƏR