Dünən Misli premyer-liqasında 29-cu tura start verildi. İlk qarşılaşmanda "Kəpəz" səfərdə "Araz-Naxçıvan"ı məğlub etdi - 2:1.

Matçdan sonra gəncəlilərin braziliyalı müdafiəçisi Junior Martinslə əlaqə saxlayıb, həm oyun, həm də komandasının ümumi durumu haqda fikirlərini öyrəndik. O, "Football-plus.az"la söhbətdə başqa məqamlara da toxundu.

- Əvvəlcə "Araz-Naxçıvan"la oyun haqda fikrinizi öyrənək. Matç necə keçdi? 28-ci turda “Qarabağ”a böyükhesablı məğlubiyyətdən sonra qazanılan 3 xal psixoloji cəhətdən sizə necə təsir etdi?
- Çətin oyunlardan birini geridə qoyduq. Qələbə bizim üçün çox vacib idi. "Qarabağ"a uduzandan sonra şükürlər olsun ki, toparlanıb yaxşı çıxış etdik və meydandan qələbəylə ayrıldıq.

- Hazırda “Qəbələ” ilə aradakı xal fərqi 14-ə çatıb. Elitada qalacağınıza əminsiz? Xal fərqi komandada arxayınlıq yarada bilərmi?
- Göründüyü kimi, "Qəbələ"dən xeyli üstünük. Xal fərqimiz də az deyil. Amma rahatlaşa bilmərik. Çünki hələ çempionat hələ bitməyib. Qarşıda 7 oyun var və diqqətimizi "Kəpəz"i elitada saxlamağa yönəltməyə davam edəcəyik.

- Səncə, Adil Şükürov yaxşı komanda qura bildimi? Kollektivin bugünkü yerində onun rolu nə qədərdi?
- Əlbəttə, Adil müəllim yaxşı məşqçidi və bizə çox kömək etdi. Onun necə biri olduğunu bilmək üçün gəlişindən sonra komandanın xal ehtiyatını necə artırdığına və "Kəpəz"in təkamülünə baxmaqla görə bilərsiz. Məncə, bu, sualınızın cavabıdı.

- Komandanın ən fəal üzvlərindən birisən və mətbuatda həm Azərbaycan, həm də başqa ölkələrin klublarının səninlə maraqlandığı deyilir. Qaneedici təklif gəlsə, "Kəpəz"dən getməyin mümkündü?
- Düzdü, hazırda çoxu məndən bu barədə soruşur, lakin mən heç nə bilmirəm. Təklif almamışam. Bütün diqqətimi çempionatın qalan oyunlarına kökləmişəm. Gələcəyimlə bağlı qərarı mövsüm bitəndən sonra verəcəm.

- Ümumiyyətlə, Azərbaycan çempionatını necə qiymətləndirirsən? Məsələn, “Qarabağ”ın sona 8 tur qalmış çempionluğu təmin etməsinə münasibətin necə oldu? Həm də bu ilk dəfə baş verdi.
- “Qarabağ”ın əla komandası var. Onlar bu uğura layiqdi. Amma Azərbaycan çempionatı daha da güclü ola bilər.

- Karyerana ölkəmizdə davam etmək istəyirsən? Yoxsa başqa ölkələrdən gələn təkliflər ön planda olacaq?
- Prioritetim Azərbaycanda qalmaqdı. Uzun müddətdi ölkənizdəyəm və bura öyrəşmişəm. Amma sabah nə olacağını bilmirik. Hər şeyi zaman göstərəcək.

RÖYANƏ OĞUZ