“Araz-Naxçıvan” – “Şamaxı” oyunundan sonra “qırmızı-ağlar”ın braziliyalı yarımmüdafiəçisi Felipe Santosla söhbətləşdik.

- Matçla bağlı düşüncələrin...
- Çətin oyun keçdi. Rəqib daha çox müdafiə olunmağa çalışırdı. Gücümüzü maksimum ortaya qoyub oynamağa səy göstərdik, amma yenə də çətin oldu. Birinci hissədə rəqib daha üstün idi, ikincidə isə biz sürətliydik.

- “Araz-Naxçıvan”a uyğunlaşmısanmı, tam formaya düşmüsənmi?
- Azərbaycanda olduğuma görə şadam. Komandada yeni oyunçular var. Buna görə daha çox çalışmalıyıq. Bir-birimizi tanımağa çalışırıq. Belə davam etsək, çempionatda nəsə əldə edə bilərik. Təbii ki, mən də qol vurmalı, komandama daha da xeyir verməliyəm. Hamı mənə inanır. Düşünürəm ki, yaxşı bir mövsüm keçirəcəyik. Öz üzərimdə çalışmalıyam. Zamanla komanda yoldaşlarımı da daha yaxşı tanıyıram. Növbəti oyunlarda rəqib qapısına yol tapmağa çalışacam.

- Əvvəllər də Azərbaycanda oynamısan. Çempionatın səviyyəsini necə görürsən?
- İki il əvvəl Azərbaycanda oynayanda vəziyyət indiki kimi deyildi. Vəziyyət dəyişib, daha da yaxşılaşıb. Asan heç nə yoxdu. Əksər komandalar Braziliya, Portuqaliya və fərqli ölkələrdən transferlər edib. Düşünürəm ki, bu mövsüm əvvəlkilərdən daha yüksək səviyyədə olacaq. Çünki bütün komandalar yaxşı dəyişikliklər edib, güclü futbolçular gətirib.

- Hakimliklə bağlı hansısa fərq görürsən?
- Yox. Elə şeylər var ki, baxırsan, orda qayda pozuntusu yoxdu. Burda - Azərbaycanda referilərin necə olduğunu bilirəm, buna öyrəşməliyik.