“Zirə” sabah doğma meydanda Konfrans Liqasının pley-off mərhələsi çərçivəsində “Omoniya” ilə cavab matçına çıxacaq.
“Football-plus.az” xəbər verir ki, “qartallar”ın baş məşqçisi Rəşad Sadıqov oyundan öncə keçirilən mətbuat konfransında iştirak edib və jurnalistlərin suallarını cavablandırıb:

- Komanda, həmçinin, siz həmin ilk oyunun şokunu üstünüzdən ata bilmisiz? Kədərli görünürsüz..
- Normaldı. Son 3 gündə 2 məğlubiyyət almışıq. Oyundan gözləntimiz o deyildi. Futbolun da gözəlliyi ondadı ki, hər şey sənin gözlədiyin kimi olmur. Elə oyundan sonra da analiz etdikdə qollara baxdıqda görürük ki, biz özümüz deyildik. Bəlkə də ən uğursuz oyunumuzu keçirtdik. İstər-istəməz məğlubiyyət olduqda məyusluq olur. Sabahkı oyuna tam şəkildə köklənirik. Qələbə qazanmaq bizim üçün çox vacibdi. Qələbə qazanaraq ordakı məğlubiyyəti unutdurmağa çalışacağıq.

- Sabah möcüzəyə inanırsız?
- Ümumiyyətlə, sabah oyunda əsas düşüncəmiz ondan ibarətdi ki, hər epizod uğrunda mübarizə aparaq və əlimizdən gələni edək. İnşallah hər şey uğurlu alınsa, sona qədər mübarizə aparacağıq.

- İndiki zamanınızı məşqçilik karyeranızın zirvəsi saymaq olar?
- Keçən ilki “ikincilik” asan olmadı. 36 turluq çətin oyunlardan keçdik. Həm ötənilki “ikincilik”, həm də bu ilki pley-offda iştirak etmək nəticə olaraq məşqçilik karyeramın zirvəsidi. Amma bunu əldə etməyimdə futbolçularım böyük pay sahibidilər. Onlar olmasaydı mən bu gün bunu əldə edə bilməzdim.

- Bu gün keçiriləcək “Qarabağ” - “Dinamo” matçında komandaların şanslarını necə dəyərləndirirsiz?
- Şansları bərabər dəyərləndirirəm. Lap “Qarabağ” səfərdə 1:0 hesablı qələbə qazansaydı da bərabər dəyərləndirəcəkdim. “Qarabağ” səfərdəki oyununu təkrarlasa, inanıram ki şansımız olacaq. İnsanlar köklənib ki, ilk 15-20 dəqiqədə qol olsun. Lap 60-cı dəqiqədə də qol vurub ardını gətirmək olar. Onlara uğurlar arzulayıram. Bütün rəhbərlik, komanda və azarkeşlər bir olub bu oyunda istədiyi nəticəni əldə edəcək.

KAMAL SƏFƏR