“Zirə” bu gün Konfrans Liqasının pley-off mərhələsinin ilk oyununda “Omoniya”nın qonağı olacaq.

Tarixində ilk dəfə avrokuboklarda bu qədər irəliləməyi bacaran “qartallar” daha bir uğura imza atmağa yaxındı.

Konfrans Liqası
pley-off, ilk oyun
Omoniya (Cənubi Kipr) – Zirə 6:0
Amin Xammas, 13. Vili Semedo, 34-p; 70. Mariuş Stepinski, 45+1; 54. Evandro, 60.
Hakimlər: YURİ FRİŞER, Veyko Mostnik, Sander Saqa, Kristo Kulyastinen (hamısı Estoniya).
22 avqust. Nikosiya, “GSP Arena”. Saat 21.00.

“Zirə” “Osiyek”lə keçən gərgin mübarizənin sonunda istəyinə nail oldu. “DAK-1904”ü sıradan çıxaran komanda ardından xorvatları penalti seriyasında “dəfn etdi”. İndi növbə “Omoniya”nındı.

Premyer-liqaya uğurla start verən qəsəbə təmsilçisi səfər matçına daha yaxşı hazırlaşmaq məqsədilə 3-cü tur matçını təxirə saldı. Yəqin ki, Rəşad Sadıqov bu fürsətdən yararlanıb və komandasını çətin rəqibə qarşı sınağa kökləyə bilib. Bu arada Cənubi Kipr çempionatında yeni “futbol ili”nin avqustun 25-də başlayacağını qeyd edək. Yəni rəqib “Zirə”dən daha az oyun keçirib. Matçın səfərdə keçirilməsi də təmsilçimizə əngəl olmamalıdı. “Qartallar”ın son vaxtlar göstərdiyi oyun ona işarədi ki, futbolçular bütün gücüylə çıxış etsə və fors-major hallardan qaçsa, səfərdən sərfəli nəticəylə qayıtmaq iqtidarındadı.

Əskəriyyəti tərəflərin şanslarını bərabər dəyərləndirir. Sözsüz, “Zirə”nin motivasiyası tarixi uğurların davamını gətirməkdən istəyindən qaynaqlanmalıdı. Nə olsun ki, rəqib avrokubok təcrübəsinə görə favorit sayılan “Omoniya”dı? Yox- yox, kiprliləri kiçiltmirik. Onsuz da bu komanda azərbaycanlı futbolsevərlərə tanışdı. Kiprlilər Konfrans Liqasının 2021/22 mövsümündə “Qarabağ”la eyni qrupa düşüb, ağdamlılardan cəmi 1 xal alıb - 2:2, 1:4. Ötən “futbol ili”ndə də bu tunirdə görünən komanda “Qəbələ”nin 3-cü təsnifat mərhələsinə yüksəlməsinə icazə verməyib – 2:3, 1:4.

Maraqlıdı ki, “Omoniya” avrokubokların yeni mövsümündə yalnız qələbə qazanıb. Komanda Gürcüstan “Torpedo”sunu (3:1, 2:1) və Macarıstan “Fehervar”ını (1:0, 2:0) sıradan çıxarıb. Yəni Cənubi Kiprin 21 qat çempionunu istəsək də, kiçildə bilmərik. Lakin “Zirə” də artıq əvvəlki deyil. “Qartallar” da hələ Konfrans Liqasının təsnifat mərhələlərində uduzmayıb!

Odu ki, təmsilçimizdən azı heç-heçə gözləyə bilərik. Təbii ki, məqsəd qələbə olmalıdı. Axı səfərdən daha arxayın qayıtmaq perspektivi ağız sulandırır...

KƏNAN BAHADIR