“Barselona”nı bu yay tərk edən futbolçuların sırasına daha biri qoşulub. Klub Serxi Roberto ilə də yolları ayırıb.

İspaniya nəhənginin mətbuat xidmətinin məlumatına görə, müdafiəçi ilə müddəti başa çatan müqavilənin yenilənməməsi qərara alınıb. 32 yaşlı Serxi “Barselona”nın yetirməsidi. O, göy-qırmızı formanı 373 oyunda daşıyıb, 19 qol vurub və 43 məhsuldar ötürmə verib. İspaniya yığmasında 11 oyuna 1 qol vuran Serxi bir neçə həftə əvvəl karyerasını İngiltərədə davam etdirmək istəyini dilə gətirib.

Təcrübəli futbolçu sosial şəbəkə hesabına bu cümlələri yazıb:

Yeri gəlmişkən, “Barselona” rəhbərliyinin Ansu Fati ilə də yolları ayırmaq qərarına gəldiyi iddia olunur. Xəbəri yayan “sport.es” saytına inansaq, Kataloniya klubunun başbilənləri hələ də Fatiyə güvənmir. İdman direktoru Deku Souza gənc futbolçunun agenti Jorje Mendeşə müştərisi üçün yeni klub axtarmalı olacağını bildirib.

Xatırladaq ki, Ansu ötən mövsüm icarə əsasında “Brayton”da oynayıb. İspaniyalı forvard bu komandada keçirdiyi 30 oyunda 4 qol vurub və 1 məhsuldar ötürmə verib.