“Barselona”nı daha iki futbolçu tərk edib.

"Football-plus.az" xəbər verir ki, hər ikisinin klubdan ayrılacağı gözlənilirdi.

Ansu Fatinin “Brayton”a keçidi rəsmiləşib. İngiltərə klubunun saytının məlumatına görə, 20 yaşlı hücumçu mövsümün sonuna qədər icarə əsasında premyer-liqa təmsilçisində çıxış edəcək. “Barselona”nın yetirməsi olan Fati bu mövsüm La Liqada 3 oyuna çıxıb.

Kataloniyalıların sıralarını Kleman Lanqle də tərk edib. “Aston Villa” müdafiəçini icarəyə götürüb. Onunla müddəti mövsümün sonunadək razılaşdırılan müqavilə imzalanıb. Qeyd edək ki, Lanqle ikiaylıq fasilədən sonra İngiltərəyə qayıdıb. Fransalı müdafiəçi ötən mövsüm “Tottenhem”də də icarə əsasında çıxış edib. O, bu komandanın heyətində bütün turnirlərdə 35 oyuna çıxıb, 1 qol vurub və 2 məhsuldar ötürmə verib.

“Barselona” Lanqleni 2018-ci ildə “Sevilya”dan alıb. Onun transferi Kataloniya klubuna 35,9 milyon avroya başa gəlib. Klemanın “Barselona” ilə müqaviləsinin müddəti 2026-cı ilin iyununa qədərdi.