Ötən ilin dekabrında FİFA tərəfindən transfer cəzası alan ''Antalyaspor'' nəhayət, şad xəbər alıb.

Uzun müddət qaynaq axtarışında olan Antalya təmsilçisi 1,3 milyon avroluq borcu ödəyib və 240 günlük aradan sonra transfer qadağası aradan götürülüb. Rəhbərlik dərhal 6 yeni transferdən 4-nün - Abdulla Yiğiter, Talisson da Silva, Sönər Dikmən və Kənan Piriçin lisenziyasını çıxarıb. Brayan Samudio ilə ''Beşiktaş''dan transfer edilən Əmrəcan Uzunhanın lisenziyası isə şənbə günkü Göztəpə ilə oyuna qədər çıxarılacaq.

Qeyd edək, transfer qadağası üzündən ''Antalyaspor'' ötən mövsümün gedişində Nuri Şahinin istefasından sonra baş məşqçi postuna gələn Sərgən Yalçının tələb etdiyi oyunçuları ala bilməmişdi. Hazırda baş məşqçi Aleks de Souzadı. Türkiyə futbolu üçün əfsanəvi simalardan olan braziliyalının müqaviləsində xüsusi maddə var idi. Belə ki, transfer qadağası aradan götürülməsəydi, Aleksin müqaviləni birtərəfli qaydada ləğv etmək hüququ var idi.

Onu da bildirək ki, qadağanın qalxmasına baxmayaraq klubun yenidən cəzalanmaq ehtimalı heç də az deyil. İsrailli Saqiv Yehezkel ilə bağlı məlum olay üzündən FİFA ''Antalyaspor''a 100 min avro cəza verib. Bu məbləğ 45 gün ərzində ödənilməlidi. Bundan başqa klubun sabiq futbolçularından Luis Adrianonun məsələsi hələ də İdman Arbitraj Məhkəməsindədi. Zimer Bitiqinin FİFA-ya ünvanladığı şikayətə isə ən qısa müddətdə baxılacaq.

ƏLİ