Ederson futbolçu həyatı ilə bağlı qəti qərara gəlib.

O, karyerasını “Mançester Siti”də davam etdirəcəyini açıqlayıb. 30 yaşlı qapıçı ilə yayboyu Səudiyyə Ərəbistanı klublarının maraqlandığı xəbər verilirdi. Braziliyalı futbolçu ESPN-ə açıqlamasında “fərziyyələrə son verin. Məşqçim və direktorumla danışdım. Təbii ki, ailəmlə də məsləhətləşdim. Bu, ortaq qərar idi. Biz daha bir neçə il “Mançester Siti”də qalırıq. Gələcəyimin hələ müəyyənləşmədiyini deyəndən sonra bir neçə təklif aldım. Təbii ki, media çox şey iddia edir, bəzən bir az uydurur. Amma indi mənim gələcəyimlə bağlı qərar verilib, xüsusilə də Qvardiola ilə söhbətdən sonra. Mən indi bütün diqqətimi “Siti”də oynamağa yönəltmişəm” deyib.

Ederson MS-də 2017-ci ilin yayından çıxış edir. O, 2023/24 mövsümündə 43 oyuna çıxıb, 34 top buraxıb və 16 matçda qapısını toxunulmaz saxlayıb.