David De Xea karyerası ilə bağlı vacib qərar vermək haqda düşünür. O, yaşıl meydanı birdəfəlik tərk edə bilər.

"Football-plus.az" xəbər verir ki, bu yay “Mançester Yunayted”i azad agent kimi tərk edən ispaniyalı qapıçı karyerasını başa vurmağı götür-qoy edir. Bunu “The Guardian” qəzeti iddia edir.

Bu mənbəyə görə, 32 yaşlı futbolçu ona ambisiyalı klubun əsas heyətində oynamaq imkanı verəcək təklif alacağına ümid edir. De Xea əks halda əlcəklərini birdəfəlik mismardan asmaq qərarını verəcək. O, Səudiyyə Ərəbistanı klublarından təklif alsa da, bundan sonra yalnız pul qazanmaq niyyəti güdmür.

Qeyd edək ki, David MY-də 2011-ci ildən çıxış edirdi. Bu komandada keçirdiyi 12 il ərzində 545 oyunda iştirak edən futbolçu 593 top buraxıb və 150 matçda qapısını toxunulmaz saxlayıb.