“Oyunları yarı təəssüf, yarı gərginlik içində izlədim. Xorvatiyanin "Osiyek"ini çoxdan izləyirəm. Sözsüz, güclü komandadı. Həmçinin "Zirə" özü də pis deyil, yaxşı formadadı. Ötənilki və indiki klub arasında xeyli fərq var. Komanda indi “oturuşmuş” futbol oynayır. Yəni oyuna baxmaq zövq verir. Baxmayaraq ki, sonda hesab bərabərləşdi, amma oyunun gedişində, xüsusilə də birinci hissədə "Zirə"  kifayət qədər epizodları itirdi. Təsadüf də adlandırırmaq olar. Amma oyun üstünlüyünə görə "Zirə" heç də xorvatiyalilardan geri qalmadı. “Sabah"ın çıxışı sözün həqiqi mənasında təəccübləndirdi. "Makkabi" ilə keçirdikləri birinci oyun hara, sonrakı oyunlar hara. Tam rabitəsiz, məntiqsiz, əlaqəsiz oyun idi. Heç nə anlamaq olmurdu. Yaxşı ki, 1:0 bitdi, daha böyük hesab ola bilərdi. Hər iki komandaya uğurlar arzulayıram. Ümid edirəm ki, cavab görüşündə müsbət nəticələrlə bizi  sevindirərlər”.

“Deyərdim ki, "Zirə" yaxşı nəticə ilə Bakıya dönür. İnanıram ki, evdəki görüşdə də özünü yaxşı tərəfdən göstərək mərhələ keçə bilər. "Sabah" isə heç də ürəkaçan çıxış etmədi. İrlandiya klubu "Makkabi" kimi güclü rəqib deyildi. Təəssüf ki, komanda azlıqda qalaraq məğlub duruma düşdü. İnanıram ki, "bayquşlar" da cavab görüşündə yaxşı oyun nümayiş etdirərək mərhələ keçə bilər. Hər iki təmsilçimizin pley-offdakı şanslarını 50-nin 50-yə nisbətində dəyərləndirərdim. Ona görə ki, "Omoniya" - "Fehervar" matçını bir qədər izlədim və məncə, keçilməz rəqiblər deyillər. Düşünürəm ki, "Zirə" bir qədər də toparlansa, qrup mərhələsinə düşmək şansı var. Həmçinin "Sabah"ın da bəxti gətirə bilər. Lakin Masazır təmsilçisinin işi bir qədər çətin olacaq. Çünki “İstanbul” BŞ asan rəqib deyil. Yenə də yarı şansları var. Tam ciddi hazırlaşaraq Bakıdakı oyunda rəqiblərə qalib gəlmək lazımdı”.

“Hər iki təmsilçimizin növbəti mərhələyə keçmək şansı var. İlk səfər qarşılaşmaları bunu bir daha göstərdi. "Zirə" hər oyunda sona kimi mübarizə aparır. "Zirə"nin ən böyük problemi böyük hədəflər üçün bəzi futbolçuların avrokubok təcrübəsizliyi, büdcəyə uyğun mövqelər üzrə daha səviyyəli futbolçuların transfer edilə bilməməsidi. "Zirə"nin mərhələ adlamaq üçün böyük şansı var. Azarkeşlər cavab görüşündə tribunaları dolduraraq komandaya dəstək olmalıdı. "Sabah"a gəlincə, klub daha imkanlıdı, onun üçün istənilən şərait yaradılıb. "Makkabi" üzərində möhtəşəm səfər qələbəsindən sonra yüksəliş əvəzinə komandada gözlənilməz eniş yaşanır. "Sabah" tək komanda yox, klub olaraq qısa vaxtda toparlanmalı, ev oyununa kimi dəqiq səbəblər tapılmalı, geridönüş edilməli, avrokubokun startındakı "Sabah" ruhu qaytarılmalıdı. Rəqib keçiləsi komandadı. Güclü israillilərdən sonra sıradan bir komandaya məğlubiyyət qəbuledilməzdi. "Sabah" toparlanmalıdı, bu şansı qaçırmaq olmaz! Hər iki komandamıza və ağır cavab görüşü gözlənilən "Qarabağ"a uğurlar arzulayıram”.