“Zirə” Misli premyer-liqasının 1-ci turunda evdə “Səbail”ə qalib gəldi.

“Qartallar” bu oyundan 3 gün əvvəl səfərdə Slovakiya təmsilçisi “DAK 1904” üzərində qələbə qazanaraq, Konfrans Liqasının 3-cü təsnifat mərhələsinə yüksəldi. “Səbail”lə oyundan sonra İsmayıl İbrahimli “Football-plus.az”a qısa müsahibə verdi.

- “DAK 1904” ilə oyundan sonra yorğunluq olacağını bilirdik. Amma çalışdıq ki, bunu hiss etdirməyək. “Səbail”in yeni mövsümdəki ilk rəsmi matçı olduğuna görə, biz onlardan daha hazırlıqlıydıq.

- Bundan öncə avrokuboklarda 4 rəsmi oyun keçirmisiz. Bu qələbəni də həmin oyunlara bağlayırsan?
- Bəli, elə bu üzdən “Səbail”ə nisbətdə daha yaxşıydıq. Oyunlar arasında cəmi 3 gün olmasına baxmayaraq, qələbə qazandıq. Bu sevindirici haldı.

- Hissələr arasında böyük fərq oldu. İkinci hissədə “Səbail” çox yaxşı oynadı, yoxsa siz yorulmuşduz?
- Bizi hesab dayandırmadı. Amma bundan elə bir neçə gün əvvəl də oynamışdıq deyə, ikinci hissədə yorğunluğun olması normaldı. Önəmli olan qələbədi. Fərqi yoxdu ki, ilk, ya da ikinci hissədə necə oynadın.

- Bəlkə birinci yarıdakı 3:0-dan sonra sizə ikinci hissədə özünüzü çox yormamaq tapşırıldı?
- Xeyr, elə bir şey yoxdu. Bizim üçün hissələr eynidi. İkinci yarıda da fərqi artırmağa çalışdıq. Bunun üçün epizodlarımız da oldu.

- Bəs Konfrans Liqasındakı rəqibiniz “Osiyek” haqda nə düşünürsən?
- Bu oyundan sonra rəqibimiz barədə fikirləşəcəyik. Güclü rəqib olduğunu bilirik. İnşallah, növbəti mərhələyə adlayan tərəf biz olarıq.

KAMAL SƏFƏR