Robin Le Normanı “Real Sosyedad”dan transfer edən “Atletiko” heyətinə daha iki oyunçu cəlb edib.

Paytaxt klubu Aleksander Sörlot ilə Konor Qallaherin keçidini də həll edib.

Gözlənildiyi kimi, Aleksander Sörlot iş yerini dəyişib. O, İspaniyanın digər klubuna keçib. “Atletiko” “Vilyarreal”ın hücumçusunu transfer edib. Norveçli futbolçu ilə 4 illik müqavilə imzalanıb. Qeyd edək ki, 28 yaşlı Aleksander “Vilyarreal”da 2023-cü ildən çıxış edirdi. O, ötən mövsüm bütün turnirlərdə iştirak etdiyi 41 oyunda 26 qol vurub və 6 qolun ötürməsini verib. Sörlotun xidmətində “Roma” da maraqlı idi.

“Çelsi”nin oyunçusu Konor Qallaher də karyerasını “Atletiko”da davam etdirəcək. Məşhur insayder Fabritsio Romanonun yaydığı məlumata görə, klublar artıq transferlə bağlı razılığa gəliblər. Madrid təmsilçisi londonlulara 40 milyon avro ödəyəcək. İngiltərəli oyunçu ilə 5 illik müqavilə imzalanacaq. 24 yaşlı Konorun tibbi müayinədən keçmək üçün İspaniyaya yollanacağı da bildirilib. Qeyd edək ki, Qallaher İngiltərə premyer-liqasının son mövsümündə 37 oyun keçirib, 5 qol vurub və 7 məhsuldar ötürmə edib. Onun “Çelsi” ilə müqaviləsinin müddəti 2025-ci il iyunun sonuna qədər idi.