Tərlan Əhmədov: "Bizə futbolçu lazımdı"
Bu gün Azərbaycan kubokunun 1/4 finalının ilk görüşündə "Turan Tovuz" səfərdə "Kəpəz"i məğlub edib - 2:1.
Football-plus.az xəbər verir ki, oyundan sonra keçirilən mətbuat konfransında gəncəlilərin baş məçqçisi Tərlan Əhmədov məğlubiyyəti şərh edib:“İki fərqli hissə oynayır komanda. Birinci hissədə daha istəkli, maraqlı, hücuma meyilli çıxış edir. Hesabda irəlidə olsaq da, ikinci hissədə tamamilə fərqli futbol oynadıq. Şamaxıda da bunun şahidi olduq. Arxayınlıq yaranır. “Sumqayıt” ilə ev oyununda da eyni ssenari idi. Bu gün də ilk yarıda 1:0 hesabı ilə öndə olduğumuz halda fasilədən sonra istənilən kimi oynaya bilmədik. Bəlkə də vura bilmədiyimiz penalti sınma nöqtəsi oldu. Ümumillikdə birinci hissədə üstünlükdən dolayı rahat oynadıq. Son üç oyunda komanda geri addım atır. Bununda uzun səbəbləri var. Bəlkə də məğlub olmamalı idik. 11 metrlik icra olunsaydı, komanda başqa cür nəticə əldə edə bilərdi.
Şanslar hələ ki, kubokda bərabərdi. Cavab görüşü var. Çalışacağıq məsələni öz xeyrimizə həll edək. Növbəti mərhələyə keçək. Komandaya yeni futbolçular cəlb olunmalıdı. Bəzi futbolçularda arxayınlıq var. Çünki mövqelərində oyunçu yoxdu. Yorğunluq da var. Böyük ölçüdə komandaya bir neçə futbolçu cəlb olunmalıdı. Yeni nəfəs olmalıdı. Hücum xəttində aqressivliyin olmaması, topa nəzarətin itirilməsi istər-istəməz həmin problemləri müdafiədə yaşamağımıza gətirib çıxarır. Rəqib bizi əks-hücumda yaxalayıb boşluqlardan yararlanır. Problemi aradan qaldırmaq üçün bizə futbolçu lazımdı”.
Digər xəbərlər
