“Bizim transfer siyahımızda yoxdu” - “Neftçi” rəsmisi bu futbolçunun transferini təkzib etdi
Yay toplanışını başa vuran “Neftçi”nin transfer çalışmaları davam etməkdədi. Artıq bir sıra futbolçuların adı “ağ-qaralar”la çəkilir.
Fasilə zamanı Edvin Kuç, Emil Səfərov, Ramil Şeydayev və Robert Baueri heyətinə qatan paytaxt təmsilçisinin Andrey Ştoqrinlə Mikael İnqebriqtseni də transfer etmək üzrə olduğu barədə xəbərlər yayılır. Son durumun nə yerdə olduğunu öyrənmək üçün klubun media əlaqələndiricisi Rüstəm Əfsərliylə əlaqə saxladıq:
“Transfer çalışmalarımız hələ davam edir. Doğrudu, bu çalışmaları mövsümün startına kimi nəzərdə tuturuq. Ancaq sırf avqustun 2-də yekunlaşmır. Hər şey plana uyğun həyata keçirilir. Artıq dörd transfer baş tutub. Yaxın günlərdə yeni transferlərimizin yekunlaşması və açıqlanması nəzərdə tutulur. Mikael bizim transfer siyahımızda deyil. Ştoqrinin adı isə bu siyahıda var”.
Qeyd edək ki, “ağ-qaralar”ın Anxel Rodado üçün Krakov “Visla”sına təklif göndərdiyi və sonuncu mövsümdə “Portimonense”də forma geymiş sol cinah müdafiəçisi Mustafa Sek ilə də danışıqlar apardığı iddia olunur. Ukraynalı Ştoqrinin keçidi yetərincə real görünür. Andrey son mövsümü Roman Qriqorçukun çalışdırdığı “Çernomorets”də keçirib. Ukraynalı mütəxəssis həmvətəninin potensialına bələddi.
KAMAL SƏFƏR
Digər xəbərlər
