''Fənərbaxça'' qalib gəldi, Mourinyo UEFA-dan gileyləndi
''Fənərbaxça'' Joze Mourinyonun başçılığı altında ilk rəsmi oyununu keçirdi.
İstanbul nəhəngi Çempionlar Liqasının 2-ci təsnifat mərhələsinin ilk oyunu çərçivəsində səfərdə İsveçrə təmsilçisi ''Luqano'' ilə qarşılaşdı. Oyun süni ot örtüklü meydanda keçirilməsinə baxmayaraq baxımlı və məhsuldar alındı. Erkən qol buraxaraq hesabda geri düşən ''Fənər'' 4:3 hesablı əzmkar qələbə qazandı. Komanda tarixində ilk dəfə 3 qol buraxdığı bir avrokubok matçından qələbə ilə ayrıldı. Mourinyo oyunsonrası mətbuat konfransında diqqətçəkən açıqlamalar verərək UEFA-nı tənqid etdi:
''Oyundan öncə bu mövzunu çox da qabartmadım. Çünki əvvəlcədən bəhanə kimi səslənməsini istəmədim. Süni meydanda oynamaq çətin oldu. ÇL kimi bir turnirdə oyunun bu cür meydanda baş tutması qəbul edilməzdi! Çünki bu meydan yüksək səviyyəli futbol sərgiləməyə imkan vermir. Topun sürüşməsi, hərəkəti adi meydandakından fərqli olur. UEFA-nın nə üçün hələ də belə meydanlarda oynamağa icazə verdiyini anlamıram. Eləcə də ''Luqano'' kimi yaxşı komandanın nə üçün bu meydanda oynamağa ehtiyac duyduğunu anlamıram. Çünki ortaya gözəl görüntülər çıxmır. Düzdü, qapılara 7 qolun vurulması fanatlar üçün xoş oldu. Qol işin əyləncə tərəfidi. Amma digər tərəfdən 3 top buraxmağımız heç xoşuma gəlmədi. Bu, bizim üçün heç əyləncəli olmadı. Üçüncü qolda ''feyr-pley''ə əməl olunmadı. Top bizə verilməli idi''.
ƏLİ
Digər xəbərlər
